काठमाडौं, २४ असार । महानगरीय अपराध महाशाखा, टेकुमा प्रहरीको दरबन्दी एक सय ४१ जनाको हो । तर, महाशाखामा दुई सय ११ प्रहरी कार्यरत छन् ।
तीमध्ये करिब एक सय प्रहरी काजमा आएका हुन् भने महाशाखामै दरबन्दी भएका करिब ५० जना अन्यत्रै काजमा बसेका छन् । नयाँ पत्रिका दैनिकले समाचार छापेको छ ।
महानगरीय प्रहरी परिसर काठमाडौं र मातहतमा तीन हजार एकजनाको दरबन्दी छ । तर, परिसरमा दुई हजार नौ सय ५६ जना कार्यरत छन् । तीमध्ये पनि डेढ सय काजमा छन् ।
परिसरको दरबन्दीका करिब एक सय प्रहरी भने काठमाडौंबाहिर काजमा छन् । प्रहरीका हरेकजसो कार्यालयमा काज विकृति छ । प्रहरीमा करिब पाँच हजार सातजना काजमा कार्यरत छन् ।
अधिकांशले घरपायक तथा आकर्षक ठाउँमा बस्न काज मिलाउने गरेका छन् । काज विकृतिले सुरक्षा व्यवस्थामा समेत असर परेको प्रहरी अधिकारीहरू नै बताउँछन् । तर, विकृति हटाउने प्रयास भएको छैन । प्रहरी प्रवक्ता डिआइजी माधव जोशीले पाँच हजार ६ सय ९० प्रहरी काजमा रहेको जानकारी दिए ।
कहाँ कति प्रहरी काजमा ?
- प्रहरी मुख्यालयबाटः २१२१
- महानगरीय प्रहरी कार्यालयबाटः ८५७
- पूर्वक्षेत्रबाटः ११४९
- मध्यक्षेत्रबाटः ४०५
- पश्चिमाञ्चलबाटः २३३
- मध्यपश्चिम क्षेत्रबाटः ४४६
- सुदूरपश्चिम क्षेत्रबाटः ४७९
कुन पदका कति ?
- एआइजीः१
- एसएसपीः२
- एसपीः१९
- डिएसपीः४४
- इन्स्पेक्टरः१९२
- सइः ५२०
- असइ ६४९
- हवल्दारः १००७
- जवानः २९९९
- कार्यालय सहयोगीः २५७
पहुँच हुने बढी काजमा
काजमा बस्ने प्रहरी सोर्सफोर्सवाला हुने भएकाले विकृति समाधान हुन पहल नभएको स्रोत बताउँछ । कतिपय हाकिम रिझाएर त केही नेताको सोर्सफोर्समा काजमा बस्ने गरेका छन् । काज मिलाउन ठूला नेताहरूको पनि दबाब आउने गरेको प्रहरी अधिकारी बताउछन् ।
दशकदेखि एउटै कार्यालयमा
नेपाल प्रहरीमा सामान्यतः एक–एक वर्षमा सरुवा हुन्छ । तर, केही प्रहरी दशकभन्दा लामो समयदेखि एउटै कार्यालयमा बस्दै आएका छन् । आकर्षक कार्यालयमा काज मिलाएर बस्ने विकृति प्रहरीमा छ । घुमुवाका रूपमा सादा पोसाकमा काम गर्ने तथा मुद्दा शाखाका कर्मचारीमा यस्तो विकृति बढी देखिएको स्रोत बताउँछ । सुगम र दुर्गम सबै क्षेत्रमा हरेक एक–दुई वर्षमा खटाउने प्रहरीको सरुवा नीति छ । सोहीअनुसार नियमित सरुवा हुने भए पनि केही प्रहरी भने सरुवा भएको कार्यालयमा नगई आफ्नोअनुकूल हुने कार्यालयमा काज मिलाएर बस्ने गरेका छन् ।
प्रतिक्रिया