ईश्वर पोखरेल भन्छन्- सरकार गोजीको रुमाल हो र प्रचण्डलाई दिन ?

काठमाडौं, २८ जेठ । नेकपा एमालेका महासचिव ईश्वर पोखरेलले सत्ता हस्तान्तरणबारे एमाले र माओवादीबीच कुनै भद्र सहमति नभएको स्पष्ट पारेका छन् ।

शुक्रबार पत्रकारहरुसँगको छलफलमा महासचिव पोखरेलले सरकारलाई थप व्यवस्थित बनाउन माओवादीसँग एमालेको ९ बुँदे सहमति भएको भन्दै सरकार परिवर्तनबारे कुनै सहमति नभएको बताए ।

उनले भने- ‘राष्ट्रिय सहमतिको सरकार बनाउन एमाले तयार छ तर, अहिलेको गठबन्धन सरकार भत्काएर अर्को सरकार बनाउने प्रयास हो भने हामीलाई स्वीकार्य हुँदैन् ।’

नेकपा माओवादी केन्द्रका अध्यक्ष पुष्पकमल दाहाल प्रचण्डले सरकार परिवर्तनबारे लगातार बहस गरिरहेका बेला महासचिव पोखरेलले सरकार बनाउने र गिराउने खेल गोजीको रुमालजस्तो नभएको बताए । उनले भने, ‘सरकार गोजीको रुमाल होइन, आज एउटाले राख्ने, भोली अर्कोलाई दिने ।’

प्रधानमन्त्री केपी शर्मा ओलीले ल्याएका विकासका योजनाहरु पूरा गर्न उहाँकै नेतृत्वमा राष्ट्रिय सरकार बन्न आवश्यक रहेको उनको भनाई थियो ।