काठमाडौं १०, जेठ । राजधानी केन्द्रीत आन्दोलन गरिरहेको संघीय गठबन्धनले आज दिँउसो विरोध प्रदर्शन गरी कीर्तिपुरलाई आफ्नो कब्जामा लिने भएको छ ।
त्रिभुवन विश्वविद्यालयको मुख्यद्धारबाट विरोध विशाल र्याली अगाडि बढिरहेको छ । अहिले कीर्तिपुरको नयाँ बजार पुग्नै लागेको र्याली कीर्तिपुर चोकमा पुग्नेछ ।
संघीय समाजवादी फोरम नेपालका अध्यक्ष एवं संघीय गठबन्धनका संयोजक उपेन्द्र यादवले नेतृत्व गरेको र्याली कीर्तिपुरको नयाँ बजार पुगेर विरोध सभामा परिणत हुनेछ । सभालाई गठबन्धनका प्रभावशाली शीर्ष नेताहरुले सम्बोधन गर्ने कार्यक्रम छ ।
संविधान पुनर्लेखनका लागि राजधानी केन्द्रीत आन्दोलनमा होमिएको संघीय गठबन्धनले हिजो चावहिल चोकमा विशाल विरोध सभा सम्पन्न गरेको थियो ।
कीर्तिपुरको विरोधसभाका लागि त्यहाँका स्थानीय बासिन्दाको बाक्लो उपस्थिति देखिएको छ । जसले गर्दा गठबन्धनको आन्दोलनमा पछिल्लो समय काठमाडौंको विभिन्न स्थानमा भइरहेका विरोध सभाहरु दिनप्रतिदिन झन् प्रभावकारी र व्यवस्थिति हुँदै गएका छन् ।
संघीय गठबन्धनमा मधेशी, आदिवासी जनजाति, दलित, महिला, मगरात, खम्बूवान, लिम्बूवान, खस समुदाय, नेवाः लगायतका दल तथा संगठन आबद्ध छन् ।
वार्तामार्फत् समाधानका लागि आफूहरु तयार रहेपनि संविधान पुनर्लेखन गर्ने गरी माग सम्बोधन सार्वजनिक प्रतिबद्धता सरकारबाट नआएसम्म आन्दोलन जारी रहने गठबन्धनले जनाएको छ ।
प्रतिक्रिया