काठमाडौँ, ६ जेठ । विभिन्न टुक्रामा विभक्त भएका माओवादी घटकले इतिहासमै सबैभन्दा जम्बो केन्द्रीय समिति बनाएर एकता प्रक्रियालाई अगाडि बढाउने भएका छन् । एकतापछि बन्ने नेकपा माओवादी केन्द्रको केन्द्रीय समितिमा ६ सय ९९ सदस्य रहने छन् ।
बबरमहलस्थित एक पार्टी प्यालेसमा जारी रहेको एकीकृत नेकपा (माओवादी), नेकपा (क्रान्तिकारी माओवादी), नेकपा (माओवादी), क्रान्तिकारी कम्युनिस्ट पार्टी नेपालको संयुक्त केन्द्रीय समितिको बैठक बसिरहेको छ ।
बैठकस्थलमा रहेका एमाओवादी काठमाडौँका अध्यक्ष हिमाल शर्माका अनुसार एकता प्रक्रियालाई भव्य र व्यवस्थित बनाउनका लागि आवश्यक सम्पूर्ण तयारी पूरा भएको छ ।
एकता प्रक्रियामा सामान्य असहमति राख्दै आएका नेकपा (माओवादी)का संयोजक मातृका यादव पनि एकता प्रक्रियामा आएका छन् ।
एमाओवादी अध्यक्ष पुष्पकमल दाहाल र माओवादीका संयोजक यादवबीच आज बिहान भएको संयुक्त बैठकपछि यादव एकतामा सहभागी हुन तयार भएका हुन् ।
बुधबार साँझ बसेको एकता संयोजन समितिको बैठकले एमाओवादी अध्यक्ष दाहालले प्रस्तुत गरेको राजनीतिक प्रतिवेदन पारित गरेको थियो । सोही प्रतिवेदनका आधारमा साङ्गठनिक विषयलाई टुङ्गो लगाइने र आज घोषणा गरिदै छ ।
यस्तै रामबहादुर थापाले प्रस्तुत गरेको पार्टीको अन्तरिम विधानलाई पनि छलफलपछि पारित गरिने छ ।
एकता प्रक्रियामा नेत्रविक्रम चन्दको माओवादीबाट तिलक परियारको नेतृत्वमा एक दर्जन बढी केन्द्रीय सदस्य सहभागी भएका छन् । रासस
प्रतिक्रिया