काठमाडौँ, १६ साउन । व्यवस्थापिका संसदको सार्वजनिक लेखा समितिको सभापतिमा एमाओवादी सभासद जनार्दन शर्मा निर्विरोध निर्वाचित हुनुभएको छ ।
संसदको शक्तिशाली समिति लेखाको सभापतिका लागि शर्माको मात्र उम्मेदवारी परेपछि उहाँ निर्विरोध निर्वाचित हुनु भएको हो ।
बिहीबार लेखा समितिको सभापतिमा शर्माको मात्र उम्मेदवारी परेको थियो । सभापतिका लागि बिहीबार बेलुकी ५ बजेसम्मको समय तय गरिएको थियो ।
लेखा समितिको सभापति सामान्यतः प्रमुख विपक्षी दललाई दिने प्रचलन रहेकाले कांग्रेस र एमालेले दावी नगरेकाले शर्मा निर्विरोध निर्वाचित हुनुभएको हो ।
शर्माको प्रस्तावकमा समाजवादी जनता पार्टीका प्रेमबहादुर सिंह र समर्थकमा एमाओवादीका डोरप्रसाद उपाध्याय हुनुहुन्थ्यो ।
शर्मालाई शुक्रबार औपचारिक रुपमा सभापति चयन गरेपछि सभामुख सुवासचन्द्र नेम्वाङले शुक्रबार नै शपथ गराउनुभयो ।
शर्मा निर्वाचित भएपछि सार्वजनिक लेखा समतिको बैठक शर्माको सभापतित्वमा शुक्रबार नै बसेको व्यवस्थापिका संसद सचिवालयले जानकारी दिएको छ ।
प्रतिक्रिया