इटहरी, १३ साउन । राजस्व संकलनको जिम्मेवारी पाएको भन्सार कार्यालयमा काम गर्ने कर्मचारीकै मिलोमतोमा भन्सार छली हुने गरेको खुलासा भएको छ ।
केही दिनअघि विराटनगर भन्सार भएर विराटनगरतिर प्रवेश गरेको को१ख ३३६२ र ना१ ख ९७७३ नम्बरको ट्रकमा भारतबाट आयात गरिएको स्टेसनरी तथा खेलकुदमा सामग्री र भेटेरिनरी औषधि आयात गर्दा कम भन्सार मूल्याङ्कन गरेर छुट गरेको फेला परेपछि ती सामान प्रहरीले नियन्त्रणमा लिएको थियो ।
भन्सार कार्यालय विराटनगरका कर अधिकृत शान्तिराम निरौला र भन्सार एजेन्ट किशोर शाहीको संलग्नतामा झन्डै ४० लाख मूल्यका सामान ल्याउने क्रममा प्रज्ञापनपत्रमा उल्लेख परिणामभन्दा बढी सामान फेला परेको छ ।
शान्ति स्टेसनरी, सीता सज्जन ट्रेडिङ र सिंह एग्रोभेट, बादल कनौडियाको नाममा आएको अवस्थामा फेला परेको त्यो सामान राजस्व अनुसन्धान विभाग पूर्वाञ्चल इकाई कार्यालय इटहरीमा ल्याई जाँच गर्दा परिमाण धेरै फेला परेको थियो ।
प्रज्ञापनपत्रमा उल्लिखित परिमाणबाहेकका सबै सामान मूल्याङ्कन गरेर जफत गरिने त्यति नै बिगो बराबर कारबाही तोकिने राजस्व अनुसन्धान विभागको पूर्वाञ्चल इकाई कार्यालयले जनाएको छ ।
भन्सारले छाडेको स्टेसनरी सामानमा पेन्सिल, जमेट्री बक्स, क्रिकेट ब्याट, सार्पनर, क्रिकेट प्याडलगायतका तथा भेटेरिनरीका २७ प्रकारका औषधि रहेको अनुसन्धानमा सक्रिय अनुसन्धान अधिकृतले जानकारी दिएका छन् ।
प्रमुख अनुसन्धान अधिकृत योगराज पौडेलले चाँडै नै अनुसन्धान सकिने र कारबाहीको प्रक्रिया अघि बढाउने तयारी भइरहेको जानकारी दिँदै भन्सार छलेर सामान आयात निर्यात गर्ने कार्यलाई निरुत्साहित गर्नुपर्नेमा जोड दिनुभयो ।
प्रतिक्रिया