ओली सरकारको आयुबारे प्रचण्डले मुख खोले, कांग्रेस र देउवालाई धक्का

काठमाडौं, ३० फागुन । एकीकृत नेकपा माओवादीका अध्यक्ष पुष्पकमल दाहाल प्रचण्डले तत्काल सरकार परिवर्तन नहुने ठोकुवा गर्नुभएको छ ।

१३ औं महाधिवेशनबाट नेपाली कांग्रेसमा नयाँ नेतृत्व निर्वाचित भएसँगै सरकार परिवर्तनको विषयमा व्यापक चर्चा परिचर्चा भइरहेका बेला प्रचण्डले सिन्धुली पुगेर मुख खोलेका हुन् ।

उनले केपी शर्मा ओली नेतृत्वको सरकार अझै दुई वर्षसम्म कसैले हल्लाउन नसक्ने र आगामी निर्वाचन पनि यही सरकारले गर्ने ठोकुवा गर्नुभयो ।

सरकार बनाउने र गिराउने गोटी हातमा भएका प्रचण्डले यस्तो ठोकुवा गरेपछि ‘सरकार परिवर्तन हुन्छ’ भनेर भाषण ठोकिरहेको नेपाली कांग्रेस र त्यसका नेताहरुको बोली बन्द जस्तै भएको छ ।

आइतबार सिन्धुलीमा आयोजित कार्यकर्ता भेलामा बोल्दै अध्यक्ष प्रचण्डले कांग्रेस अधिवेशनले नेपालको राजनीतिमा ठूलो असर नगर्ने भनाई राख्दै भने– ‘हामी ठूलो पार्टी हुँदा पनि सरकार बाहिर रहेकै थियौं, त्यही भएर अहिले कांग्रेस ठूलो हुँदैमा केही फरक पर्दैन ।’

यद्यपी प्रचण्डले सरकारबाट जनताका पक्षमा प्रभावकारी काम नभएको भन्दै ओली सरकारप्रति असन्तुष्टि पनि पोखे । उनले प्रधानमन्त्रीको चीन भ्रमण भारतसँगको परनिर्भता हटाउन केन्द्रीत हुने जानकारी दिए ।