दाङ, ८ फागुन । नेपाली कांग्रेस दाङको सभापतिमा कीर्तिबहादुर खड्का बिजयी हुनु भएको छ ।
शेरबहादुर देउवा निकट मानिने युवा नेता कमलकिशोर घिमिरेलाई ५५ मतले पछाडि पार्दै खड्का सभापतिमा बिजयी हुनु भएको हो । खड्काले ३ सय ४० र घिमिरेले २ सय ८५ मत ल्याउनु भएको छ ।
कुल ६ सय ३९ मतदाता रहेको कांग्रेस दाङमा ६ सय २९ मत खसेको थियो । शनिबार भएको पहिलो चरणको निर्वाचनबाट सभापतिको टुङ्गो नलागेपछि आज दोस्रो चरणको निर्वाचन भएको थियो ।
सभापतिमा निर्वाचित खड्का कांग्रेस नेता खुमबहादुर खड्का समर्थक मानिनु हुन्छ । पहिलो चरणको निर्वाचनमा खड्काले ३ सय १, घिमिरेले १ सय ६० र अनिता देवकोटाले १ सय ५४ मत ल्याउनु भएको थियो । कांग्रेस सभापतिमा पराजित कमलकिशोर घिमिरे अघिल्लो कार्य समितिमा जिल्ला सचिव हुनुहुन्थ्यो ।
यसैबीच कांग्रेसका सभापतिका प्रत्यासी घिमिरेले १३औँ महाधिवेशन अन्तर्गत जिल्ला अधिवेसनमा सहभागी सबैलाई धन्यवाद दिनुभएको छ ।
घिमिरेले आज एक बिज्ञप्ति प्रकासित गरेर अधिवेसनमा आफूलाई मतदान गर्ने मतदाता, निर्वाचन प्रक्रियामा सहभागी, निर्वाचन समिति, कांग्रेस नेता तथा कार्यकर्ता, शुभेच्छुक, सञ्चारकर्मी लगायतलाई धन्यवाद दिनु भएको हो ।
उता, सभापतिमा विजयी भएका खड्काले पनि आफ्नो जित दाङ कांग्रेसको जित रहेको भन्दै खुसी साटेका छन् । उनले भनेका छन्, ‘मेरो जित सबै कांग्रेस कार्यकर्ताका जित हो । मैले पार्टीलाई मिलाएर लैजाने छु ।’
प्रतिक्रिया