नुवाकोटमा माइक्रोबस दुर्घटना, नेपाली सेनाका ८ सैनिकको मृत्यु

त्रिशूली(नुवाकोट),२३ माघ । काठमाडौँबाट अपराह्न १ बजे पश्चिमतर्फ त्रिशूली बजार जाँदै गरेको वा १ ज ७५८३ नंको माइक्रोबस मदानपुर गाविस–८, केउरिनीमा खस्दा बसमा रहेका आठ जना यात्रुको मृत्यु भएको छ ।

सडकबाट पाँच सय फिट तल खस्दा भएको सो दुर्घटनामा छ जना घाइते भएको नुवाकोटका प्रहरी नायब उपरीक्षक सिद्धिविक्रम शाहले जानकारी दिनुभयो । प्रहरीका अनुसार घाइतेहरुलाई उपचारका लागि काठमाडौं पठाइएको छ ।

मृत्यु हुनेमा धेरैजसो त्रिशूली सैनिक तालिम केन्द्र, मैथलीमा तालिम लिइरहेका सैनिक जवान रहेको प्रहरीले जनाएको छ । जसमध्ये नेपाली सेनाका ८ जना सैनिकको मृत्यु भएको पुष्टि भएको छ । घटनाको पूर्ण विवरण आउन बाँकी छ । रासस