‘विप्लव’ माओवादीको यस्तो छ गोप्य तयारी, फागुन १ मा ‘धक्का’ दिने

काठमाडौं, ३ माघ । गोप्य रुपमा राजधानी आएका नेकपा माओवादीका महासचिव नेत्रविक्रम चन्द ‘विप्लव’ले जनयुद्ध दिवस भव्य रुपमा काठमाडौंमा मनाउन नेता तथा कार्यकर्ताहरूलाई निर्देशन दिएका छन् ।

काठमाडौंको वनस्थलीमा शनिबार उपत्यकाका तीन जिल्लाका जिल्लास्तरीय नेता तथा अगुवा कार्यकर्तालाई जम्मा गरेर ‘विप्लव’ले फागुन १ गतेको जनयुद्ध दिवस राजधानीमा भव्य रुपमा मनाउन निर्देशन दिएको स्रोतले जनाएको छ । फागुन १ गते ‘विप्लव’ माओवादीले सबैको मन र मस्तिष्कमा ‘धक्का’ दिने गरेर तयारी गरेको छ ।

गोप्य प्रशिक्षणमा सहभागी एक केन्द्रीय नेताका अनुसार जनयुद्धका कारण माओवादी पार्टीले ठूलो जित हासिल गरेको बताएका ‘विप्लव’ले विभाजित माओवादी आन्दोलनलाई आफूहरूले संगठिन बनाउन सक्ने क्षमता रहेको बताए ।

‘ठूलो जित हासिल गर्दागर्दै पनि केही केन्द्रीय नेतृत्वहरूको असक्षमता र पलायनवादी सोँचका कारण माओवादी आन्दोलन विभाजित भएको छ’, महासचिव ‘विप्लव’ले भने, ‘अबफेरि माओवादी आन्दोलनलाई उचाइँमा पुगाउने दायित्व तपाई/हामीमा थपिएको छ ।’

महासचिव ‘विप्लव’ले अगाडि भनका छन्, ‘माओवादी आन्दोलनको नेतृत्व कर्ता नेकपा माओवादी हो । हामी मुल खोला हौँ । प्रचण्ड र किरणले नेतृत्व गरेको माओवादी सहायक खोला हुन् । ती खोला अन्त्यमा हाम्रो मुल खोलामा आफै आएर मिसिने छन् । हामी त्यहाँ गएर कदापि मिसिन सक्दैनौँ ।’

‘विप्लव’ले सांगठनिक विषयलाई सबैले महत्व दिनुपर्ने प्रशिक्षणका क्रममा नेताहरूलाई निर्देशन दिएका थिए । आफू सोही अभियानका क्रममा मुलुकका विभिन्न जिल्लाहरूमा सक्रिय रुपमा लागेको भन्दै उनले भने, ‘म भूमिगत भएको छैन । जनताका माझमा छु । मैले खुल्ला रुपमा सांगठनिक कार्य गर्दै आएको छु ।’

प्रशिक्षणमा अधिकांश जिल्लाहरूमा जनपरिषद् गठन भइसकेको जानकारी दिइएको थियो । जनपरिषदमार्फत ‘विप्लव’ माओवादीले आफ्नो संगठनलाई सशक्त रुपमा अगाडि बढाउने रणनीति बनाएको छ ।

प्रशिक्षणमा राजधानीमा रहेका अधिकांश केन्द्रीय नेताहरूको पनि सहभागिता रहेको थियो ।