डोल्पा, ९ पुस । युवा संघका अध्यक्ष राजीव पहारीले राष्ट्रियताका लागि जुनसुकै शक्तिसँग पनि लड्न तयार रहेको बताएका छन् ।
विकट हिमाली जिल्ला डोल्पाको दुनैमा आयोजित एमालेका सात वटा संगठनहरुको सम्मेलनको संयुक्त रुपमा उद्घाटन गर्दै अध्यक्ष पहारीले कुनै हालतमा राष्ट्रलाई विखण्डन गर्न नदिने बताए । उनले भने- ‘हामी समृद्ध नेपाल निर्माण गर्नका लागि जस्तोसुकै बलिदानी दिन तयार छौं । जस्तोसुकै नेतृत्व दिन तयार छौं तर, कुनै हालतमा विखण्डन सहँदैनौ र गर्न प्रयास गर्नेलाई छाड्दैनौं ।’
प्रेस चौतारी नेपाल, युवा संघ नेपाल, अनेरास्ववियु, नेपाल उत्पीडन जातिय मुक्ति समाज, खेलकुद महासंघ लगायत एमालेका जनसंगठनहरुको सम्मेलनमा बोल्दै पहारीले मधेस आन्दोलन राष्ट्र विखण्डनका लागि भइरहेको आरोप लगाउँदै त्यसकाविरुद्ध देशव्यापी जागरण अभियान सञ्चालन गरेको बताए ।
‘हिमाल, पहाड र तराईको एकता मजबुत पार्ने अभियान लिएर म हिमाली जिल्ला डोल्पा आएको हुँ । तपाईहरुको आर्शिवाद, सुभेच्छा लिएर यहाँबाट तराई जाँदैछु । तराईमा साप्रदायिक हिसाबले विभाजन गर्ने तत्वहरुलाई परास्त गरेर मात्र फर्किनेछु,’ उनले भने । हजारौंको संख्यामा कार्यकर्ता तथा स्थानीयबासी सहभागी उक्त सम्मेलनमा पहारीले भने- म मर्न तयार छु, तर राष्ट्रलाई खण्डित हुन दिँदैन् ।
डोल्पा प्राकृतिक सम्पत्तिले धनि जिल्ला भएकाले यहाँको फलफुल र जडिबुटीको बजार व्यस्थापन हुन नसकेको र त्यसका लागि आफूले एमालेको नेतृत्वसँग र सरकारसँग पहल गर्ने प्रतिबद्धता पहारीले जनाए ।
सम्मेलनमा एमाले पार्टी केन्द्रीय सदस्य हंशबहादुर शाही, युवा संघका केन्द्रीय सचिव बचनबहादुर सिंह, डोल्पा एमाले जिल्ला अध्यक्ष दत्तबहादुर सिंह, युवा संघका कर्णाली इन्चार्ज जितेन्द्र महत लगायतले मन्तव्य राखेका थिए ।
सम्मेलन पूर्व एमालेका कार्यकर्ताले बाजागाजासहित दुनै बजार परिक्रमा गरेका थिए । सूमन बुढाको अध्यक्षता आयोजित सम्मेलनले शुक्रबार नयाँ नेतृत्व चयन गर्नेछ ।
प्रतिक्रिया