काठमाडौं, ४ पुस । संयुक्त लोकतान्त्रिक मधेसी मोर्चाको आन्दोलनले झण्डै चार महिना पूरा गर्दैगर्दा मोर्चाभित्र केही खटपटका गन्ध बाहिर आउन थालेका छन् । ती गन्धहरू ठूला राजनीतिक मुद्दामा भन्दा पनि व्यक्तिगत र आफ्नो बडप्पनमा हुने गरेको खुलासा भएको छ ।
शुक्रबार काठमाडौंको बिजुलीबजारस्थित तराई मधेस लोकतान्त्रिक पार्टीको केन्द्रीय कार्यालयमा बसेको मधेसी मोर्चाको बैठकमा संघीय समाजवादी फोरम नेपालका अध्यक्ष उपेन्द्र यादव आउनु भएन । बिहीबारको बैठकमा उपस्थित भएका अध्यक्ष यादव बैठकमा नआउनुको कारण खोज्दै जाँदा हैरान बनाउने खालको विषय फेला परेका छन् ।
मधेसी मोर्चामा आबद्ध चार राजनीतिक दलका चार शीर्ष नेताहरूले संयुक्त रुपमा चलाएको आन्दोलनको जस कसले लिने भन्ने विषयमै खटपट भएको स्रोतले जनाएको छ । यतिसम्मकि बैठकका जानकारी पत्रकारहरूलाई दिइएको विषयमा पनि अध्यक्ष यादवले आपत्ति जनाउन थाल्नुभएको छ ।
उहाँले मिडियालाई समाचार दिँदा आफूले मात्रै दिन पाउनुपर्ने भन्दै बैठकमै कुरा राखेको स्रोतको भनाइ छ । ‘बैठकका निर्णयहरू तत्काल सार्वजनिक हुने हो भने के को बैठक र पत्रकार सम्मेलन गर्ने ?’, बैठक स्रोतले भन्यो, ‘म बैठकमा आउँदिन । किन पत्रकार सम्मेलन गर्ने । सबै निर्णय त सार्वजनिक भइसकेका छन् ।’
मधेसी मोर्चाको बिहीबार रातिसम्म बसेको बैठकका निर्णय बाहिर सार्वजनिक भएको विषयलाई लिएर संघीय समाजवादी फोरम नेपालका अध्यक्ष यादवले असन्तुष्टि जनाएर शुक्रबारको बैठक र पत्रकार सम्मेलनमा अनुपस्थित भएको स्रोतले उल्लेख गरेको छ ।
शुक्रबारको बैठकमा यादव नआएपछि तमलोपाका नेता बृषेशचन्द्र लालसहितका दोस्रो तहका नेताहरू संघीय फोरमको तिनकुनेस्थित केन्द्रीय कार्यालयमा पुगेर प्रेस विज्ञप्तिमा हस्ताक्षर गराइ पत्रकार सम्मेलनमार्फत सार्वजनिक गरिएको थियो ।
विज्ञप्तिको भाषामा पनि अध्यक्ष यादवले आपत्ति जनाउनु भएको स्रोतको भनाइ छ । मधेस आन्दोलनका क्रममा गरिएको नाकाबन्दी र सडक अबरोधका कार्यक्रमलगायतका शब्दावली राख्न अध्यक्ष यादवले नदिएको स्रोतको आरोप छ ।
ती शब्दावली नरहँदा कार्यक्रम फिर्ता भएको अनुमानसहितका समचार सार्वजनिक भएपछि मधेसी मोर्चाका केही नेताहरू चिन्तित बनेका छन् ।
प्रतिक्रिया