भारतबाट खुसी हुँदै परराष्ट्रमन्त्री थापा फर्कनुको रहस्य के हो ?

काठमाडौं, १७ मंसिर । मुलुकले नाकाबन्दीको सामना गरिरहेका बेला उपप्रधान एवम् परराष्ट्रमन्त्री कमल थापाले दोस्रो पटक भारत भ्रमण सकेर स्वदेश फर्कनुभएको छ ।

पहिलो भ्रमणभन्दा दोस्रो भ्रमण सकारात्मक र फलदायी भएको थापाको भनाइ छ । यस पटक मन्त्री थापासँग भारतीय पक्षले तितामिठा सबै कुराकानी गरेको स्रोतको भनाइ छ ।

भारतले नाकाबन्दी लगाउनुको आफ्नो बाध्यता र अब नाकाबन्दी कसरी खोल्न सकिन्छ भन्ने विषयमा परराष्ट्रमन्त्री थापासँग परामर्श गरेको छ । स्रोतका अनुसार नाकाबन्दी खोल्नका लागि भारतले नेपाली पक्षसँग ‘जस्टिफिकेशन’ खोजेको छ ।

भारतको ‘जस्टिफिकेशन’ के हुन सक्छ सार्वजनिक रुपमा बाहिर नआए पनि पत्रपत्रिकामा आएका विषयलाई नै भारतले अगाडि सारेको अनुमान गर्न सकिन्छ । मधेसी मोर्चाको मागलाई पूरा गर्नुपर्ने दबाव दिँदै आएको भारतले संविधान संशोधन गर्नुस् भन्ने पुरानै कुरा सारेको छ ।

‘संविधान संशोधन गर्नुस्’ भन्ने भारतको भनाइमा के अर्थ लुकेको छ त्यो भने पछि नै थाहा होला । तर मधेसी मोर्चाका मागलाई जसरी हुन्छ पूरा गर्नै पर्ने भारतको चाहना छ ।

यसपटक अलि नरम देखिएको भारतीय पक्षले परराष्ट्रमन्त्री थापालाई छिटो समस्याको समाधान खोज्नका लागि पनि सुझाव दिएको छ । नेपाल–भारतबीचको समबन्ध बिग्रिएकोमा भारतीय पक्ष पनि खुसी छैन ।

लामो इतिहाँस बोकेको नेपाल–भारतसम्बन्ध यो हदसम्म बिग्रिनुको पछाडिको कारण खोज्नुपर्ने समय आएको परराष्ट्रमामिलाका जानकारहरूको भनाइ छ ।

भारतले नेपालमा भारत विरोधी भावना बढ्दै गएकोमा पनि परराष्ट्रमन्त्री थापासँग गुनासो गरेको छ । ‘मन्त्रिपरिषद्का सदस्यहरू र नेताहरूको अभिव्यक्तिबाट हामी चिन्तित छौँ’, परराष्ट्रमन्त्री थापासँग भारतीय पक्षले गरेको गुनासोलाई उदृत गर्दै स्रोतले भन्यो, ‘दुई मुलुकको बिग्रदोसम्बन्धबाट भारतीय पक्ष नेपालभन्दापनि धेरै चिन्तत भएको छ ।’

यसअघि बिमानस्थलमा उपप्रधान एवम् परराष्ट्रमन्त्री थापाले मुलुकको वर्तमान स्थितिमा चाँडै नै सुधार आउने अपेक्षा आफूले गरेको बताउनुभएको छ । थापाले दुई देशका बीच कायम असमझदारी हटाउन यस पटकको आफ्नो भारत भ्रमणले सघाउ पुगेको भन्दै खुसी व्यक्त गर्नुभएको थियो ।

भ्रमणका क्रममा भारतीय विदेशमन्त्री सुष्मा स्वराजलगायत भारतीय नेता तथा पदाधिकारीसँग द्विपक्षीय सम्बन्धबारे थापाले कुरा गर्नुभएको थियो ।

उपप्रधानमन्त्री थापाले अत्यन्तै संवेदनशील र जटिल परिस्थिति भएकाले कतिपय विषयलाई अहिले नै चर्चामा ल्याएर परिस्थिति बिगार्नुको सट्टा मुलुकको स्वाधीनताको रक्षा गर्दै समस्या समाधान गर्ने क्रममा आफूले निरन्तर प्रयास गरिरहेको बताउनुभएको छ ।