विवाहित गोविन्दले रीतालाई जलजला घुमाएपछि यसरी भयो बबाल

काठमाडौं । प्रदर्शनको अन्तिम तयारीमा रहेको ‘रोल्पा रोग’ले आफ्ना गीतहरूलाई प्रचार प्रसारमा लैजान सुरू गरेको छ ।

‘रोल्पा रोग’का निर्देशक दीपक ओलीका अनुसार सुस्तसुस्त फिल्मका गीतहरूलाई इलोक्ट्रोनिक सञ्चारमाध्यमबाट प्रचार गराउन सुरू गरिएको हो ।

‘रोल्पा रोग’मा मध्यपश्चिमका जिल्लाहरूमा चल्तीको भाकालाई समेटेर राखिएको गीतले चर्चा पाउन थालेको छ । गोविन्दमधुर आचार्यको शब्द, संगीतमा रहेको ‘जाउँला कान्छी जलजला र सुनछहारी घुम्न………..’ बोलको गीतले विशेष गरेर मध्य र सुदूरपश्चिमका जिल्लाहरूमा राम्रो प्रतिक्रिया पाएको छ ।

सुन्दा आनन्द लाग्ने यो गीतमा प्रयोग गरिएका सांगीतिक बाजा र ठट्यौली शब्दहरूले उत्तिकै मनमोहक बनाइदिएको छ ।

निर्देशक ओलीका अनुसार ‘जाउँला कान्छी जलजला……’ले एफ.एम. रेडियोमा अत्याधिक स्थान पाउन थालेको छ । गीतमा संगीतकार आचार्य र गायिका रीता के.सी. स्वर छ ।

मध्यपश्चिमका जिल्लामा गाइने झ्याउरे भाकामा रहेको यो गीतका शब्द सुन्दा सुमधुर लाग्ने गरेको ओलीले दाबी छ । ‘पश्चिमेली ठेट लोकभाकामा रहेकाले यो गीतको माग र चर्चा अलि बढी भएको पाएको छु’, उनले भने, ‘दर्शक र स्रोताले गीतलाई मन पराइदिएपछि फिल्ममा पनि उत्साहित भएको छु ।’

यो गीतको छायाँकन दाङ जिल्लामा गरिएको हो । पुरन्धारा गाविसको हंसपुरस्थित एक्लेचौरडाँडामा निर्देशक ओलीले सहयोगीहरूका साथ तीन दिन लगाएर छायाँकन गरेका हुन् ।

गीतमा भीड कसरी जम्मा गर्ने भनेर निर्देशक ओलीलाई समस्या पनि भएको थियो । तर उनले सजिलो उपाय अपनाए । गाउँभरि फिल्मको गीत शूटिङ हुँदैछ भनेर हेर्नका लागि सबैलाई निम्तो दिए । पछि भीड जम्मा भयो । छायाँकन गर्न ओलीलाई समस्या परेन ।

‘गीतको भावअनुसार मेलाको दृश्य रहनुपर्ने थियो । धेरै मान्छे चाहिने भएकाले कहाँबाट ल्याउँ भन्ने समस्या भयो’, उनले भने, ‘तर गाउँभरि फिल्मको शूटिङ छभनेर हेर्न सबैलाई खबर पठाए । मान्छे आइदिए । मलाई गीतको छायाँकन गर्न सजिलो भो ।’

गीतमा शिशिर भण्डारी, कुलदीप अधिकारी, जनक थापा, बिनु खड्का, अशोक विक, सन्ध्या पौडेल, कश्मिरा रसाइली, जोन योञ्जनलगायतले नृत्य गरेका छन् । कलाकारहरूलाई नचाउने जिम्मा भने कोरियोग्राफर अशोक विकले गरेका हुन् । उनलाई क्यामरामा साथ नवराज उप्रेती र निशल पौडेलले दिएका छन् ।

करिब सत्तरी हजार खर्च भएको यो गीतमा मेहनतअनुसारको सुन्तुष्टि आफूले पाएको फिल्मका निर्देशक ओलीले उल्लेख गरे । ‘जुन उद्देश्यले फिल्ममा यो गीत राखेको थिए । त्यो पूरा भएको छ’, उनले भने, ‘फिल्मलाई माथि उठाउन यो झ्याउरे गीतले ठूलो मद्दत गर्छ । गीतको सबै पक्षसँग म सन्तुष्ट छु ।’