३ मंसिर २०८३, बिहिबार

बंगलादेशमा भड्कियो हिंसा : ४ जनाको मृत्यु, दर्जनौं संरचनामा आगजानी र विष्फोट

0
Shares

फन्ट परिवर्तन गर्नुहोस:

  • change font
  • change font
  • change font

ढाका । बंगलादेशमा राजनीतिक हिंसा र आगजनीका छुट्टाछुट्टै घटनामा कम्तिमा चार जनाको मृत्यु भएको छ ।

बिहीबारका लागि ‘अवामी लिग’ (जसका गतिविधिहरूमाथि प्रतिबन्ध लगाइएको छ)ले आह्वान गरेको राष्ट्रव्यापी बन्द (लकडाउन)को पूर्वसन्ध्यामा झडप, बम आक्रमण र व्यापक तोडफोडका घटना तीव्र बनेका छन् ।

बुधबार साँझ नराइलमा बीएनपी सम्बद्ध दुई नेताको हत्या भएको छ । उक्त आक्रमण अवामी लिगका कार्यकर्ताहरूले गरेको आरोप छ ।

यसैगरी, मंगलबार राति फरिदपुरमा ‘कृषक दल’का एक नेताको मृत्यु भएको छ ।

बुधबार बिहान पिरोजपुरमा अज्ञात आक्रमणकारीहरूले पार्किङ गरी राखिएका दुईवटा बसमा आगो लगाउँदा एक बस सहयोगी (हेल्पर)को जिउँदै जलेर मृत्यु भयो ।

गोपालगञ्जबाट सुरु भएको हिंसा अन्य धेरै जिल्लामा फैलिएको छ । गोपालगञ्जमा प्रहरी चौकी, सुरक्षा निकायका सवारी साधन र बीएनपी सांसदहरूको निवासमा आक्रमण भएको थियो । यस घटनापछि थप सयौं सुरक्षाकर्मी परिचालन गरिएको छ ।

नराइलको कालिया उपजिल्लामा अवामी लिगसँग जोडिएको हिंसाको विरोधमा बीएनपी सम्बद्ध समूहहरूले आयोजना गरेको मोटरसाइकल र्‍यालीमा आक्रमण हुँदा कृषक दलका नेता ४५ वर्षीय शाहिनुर शेख र जातीयवादी सामाजिक सांस्कृतिक संस्था (जासास)का नेता ३५ वर्षीय सोहेल मोल्लाको मृत्यु भयो ।

यो आक्रमण बुधबार साँझ बेन्दार चारस्थित बट्टोला चोकमा भएको थियो । नराइलका प्रहरी उपरीक्षक मोहम्मद अल मामुन सिकदारले राति करिब १० बजे दुई जनाको मृत्यु भएको पुष्टि गरे । घटनामा अन्य धेरै व्यक्ति घाइते भएका छन् ।

यस्तै, फरिदपुरको भंगा क्षेत्रमा मंगलबार राति ढाका–बरिशाल राजमार्गमा गरिएको अवरोध (नाकाबन्दी)का क्रममा गम्भीर रूपमा जलेका कृषक दलका नेता राजु मोल्लाको मृत्यु भयो ।

बीएनपी नेताहरूले अवामी लिग र छात्र लिगका कार्यकर्ताहरूले उनीमाथि आक्रमण गरेको र मोटरसाइकलहरूमा आगो लगाएको आरोप लगाएका छन् । प्रहरीले घटनामा संलग्नहरूको पहिचान गर्ने प्रयास भइरहेको जनाएको छ ।

पिरोजपुरको भन्डारियामा बुधबार बिहान करिब ३:४५ बजे अज्ञात आक्रमणकारीहरूले दुईवटा सवारी साधनमा आगो लगाउँदा पार्किङ गरी राखिएको बसभित्र सुतिरहेका बस सहयोगी मोहम्मद सियामको जलेर मृत्यु भयो । प्रहरीका अनुसार आक्रमणकारीहरूको अझै पहिचान हुन सकेको छैन ।

नाजिर्पुरमा पनि धेरै पसलमा आगो लगाइएको छ । त्यहाँ आक्रमणकारीहरूले सरकारी अनुदान प्राप्त खाद्य सामग्री राखिएको एउटा युनियन परिषद्को गोदामलाई निशाना बनाएका थिए ।

मंगलबार राति तुन्गीपाडा प्रहरी चौकी, प्रहरी तथा ‘बोर्डर गार्ड बंगलादेश’का सवारी साधन र बीएनपी सांसद एसएम जिलानीको निवाससहित कम्तिमा २० वटा घरमा आक्रमण भएपछि गोपालगन्ज हिंसाको मुख्य केन्द्रबिन्दु बनेको छ ।

प्रहरीले अवामी लिग र छात्र लिगका केही शंकास्पद कार्यकर्तालाई पक्राउ गरेपछि हिंसा भड्कियो । त्यसपछि प्रदर्शनकारीहरूले प्रहरी चौकीमा धावा बोले, त्यहाँ तोडफोड गरे र सवारी साधनमा आगो लगाइदिए ।

बुधबार साँझसम्म पुनः आक्रमण हुनसक्ने डरले तुन्गीपाडा प्रहरी चौकीका अधिकांश प्रहरी कर्मचारी जिल्ला प्रहरी कार्यालय (डिस्ट्रिक्ट पुलिस लाइन्स)मा सरेका थिए । सुरक्षा व्यवस्था पुनः कायम गर्न अधिकारीहरूले गोपालगञ्जभरि बंगलादेश बोर्डर गार्डका २१ प्लाटुन परिचालन गरे ।

बुधबार राति करिब ८ बजे भएको अर्को आक्रमणमा अज्ञात व्यक्तिहरूले गोपालगञ्ज–२ का सांसद डा. केएम बाबरको निवासको मुख्य प्रवेशद्वारमा आगो लगाइदिए र उनको निजी कार्यालयमा तोडफोड गरे । सोही भवनमा रहेको एउटा क्लिनिकबाट बिरामीहरू जसमा नवजात शिशु र शल्यक्रिया (सिजेरियन सेक्सन) पछि स्वास्थ्यलाभ गरिरहेका महिला समेत थिए, भाग्न बाध्य भए । यस घटनामा कुनै मानवीय क्षति भएको खबर छैन ।

बढ्दो अशान्तिका कारण गोपालगञ्जमा पठनपाठन पनि प्रभावित भएको छ, त्यहाँको स्थानीय विज्ञान तथा प्रविधि विश्वविद्यालयले दुई दिनका लागि विश्वविद्यालय बन्द गर्ने घोषणा गर्नुका साथै परीक्षा पनि स्थगित गरेको छ । जिल्ला कारागार वरपर सुरक्षा व्यवस्था कडा पारिएको छ ।

यसैगरी, कक्स बजारको रामुमा ‘स्वेच्छासेवक लिग’का एक नेताका आफन्तहरूले प्रहरीमाथि आक्रमण गरी उनलाई हिरासतबाट मुक्त गराएका छन्, जसमा दुई प्रहरी अधिकारी घाइते भएका छन् ।

खुल्नामा बुधबार राति अज्ञात आक्रमणकारीहरूले जिल्ला न्यायाधीशको अदालत भवनमा एउटा घरेलु बम प्रहार गरे, तर त्यो पड्किन सकेन ।

रंगपुरमा १० घण्टाको अन्तरालमा दुईवटा बसमा आगो लगाइयो । अनुसन्धानकर्ताहरूले यसमा छात्र लिगको संलग्नता हुनसक्ने आशंका गरेका छन् । यी आक्रमणहरूले यातायात सेवा अवरुद्ध पारेका छन् र स्थानीय बासिन्दामा त्रास फैलाएका छन् ।

अवामी लिगसँग सम्बन्धित सम्पत्तिहरूलाई लक्षित गरी प्रतिशोधपूर्ण हिंसाका घटना पनि भएका छन् ।

सिराजगञ्जमा आक्रमणकारीहरूले पार्टीको जिल्ला कार्यालय र पूर्व सांसद हबिबे मिल्लात मुन्नाको निवासमा आगो लगाइदिए । कुमिलामा अवामी लिगको कार्यालय र पूर्व सांसद एकेएम बहाउद्दिन बहारको निवासमा आक्रमण गरी आगजनी गरिएको छ ।

यसैबीच, प्रहरी तथ्याङ्क अनुसार विगत १० दिनमा कम्तिमा २८ जिल्लामा बम विस्फोटका घटना भएका छन् र सवारी साधनमा आगजनी गरिएको छ । नोभेम्बर १० यता ग्रामीण बैंकका कम्तिमा ३७ कार्यालय पनि आक्रमणको निशानामा परेका छन् ।

गृहमन्त्री सलाहुद्दिन अहमदले विदेशमा रहेका अवामी लिगका नेताहरूले हिंसालाई प्रोत्साहन गरिरहेको आरोप लगाएका छन् । साथै, उनले आक्रमण र तोडफोडमा संलग्न व्यक्तिहरूलाई कानुनी कारबाहीको दायरामा ल्याइने चेतावनी दिएका छन् ।

अवामी लिगले आज ‘लकडाउन’ (बन्द) लागू गर्ने तयारी गरिरहेको छ भने अर्कोतर्फ ‘जातीयवादी छात्र दल’ले बिहीबार ढाकामा जुलुस निकाल्ने घोषणा गरेको छ । यस अवस्थाले थप झडप हुने डर बढाएको छ ।