हुम्ला । हुम्लामा चार करोड रुपैयाँ मूल्य बराबरको खसीबोकाको व्यापार भएको छ ।
दशैं वर्षको एकपटक आउने मुख्य चाडपर्व भएको र खसीबोकाको बलि दिनैपर्ने सामाजिक तथा धार्मिक मान्याताका कारण यसको व्यापार वृद्धि भएको हो ।
बझाङको साइपालबाट चार सय खसीबोका ल्याएका व्यापारी मानबहादुर पार्कीले झण्डै एक करोड रुपैयाँको व्यापार भएको बताए ।
२५ प्रतिशत व्यापार उधारोमा गएको भए पनि दशैंमा खसीको व्यापार हालसम्मकै धेरै भएको उनको भनाइ छ ।
सुदूरपश्चिमका लिपुलेख, दार्चुला, अपी हिमाल क्षेत्रबाट खसी ल्याएर दशैंमा बिक्री गरेको उनले बताए ।
यसैगरी, साढे तीन सय खसी बिक्री गरेका खसी व्यापारी पाल्दन सुनारले यो वर्ष दशैंमा हालसम्मकै धेरै व्यापार भएको जानकारी दिए ।
२० हजारदेखि ३५ हजार रुपैयाँसम्मका खसीहरु स्थानीयले दशैंका लागि किनेर बलि चढाउने कार्य गरेको सुनारको भनाइ छ ।
चीनले हिल्सा नाकाबाट च्याङ्ग्रा आयात गर्न नदिएका कारण स्थानीय खसीहरु बढी बिक्री भएको पाइएको छ ।
३४ हजार रुपैयाँको खसी दशैंमा बलि चढाएका स्थानीय जयबहादुर शाहीले मूल्य बढेपछि खसीको व्यापार नघटेको बताए । यो वर्ष विगतभन्दा खसीको व्यापार कम हुने अपेक्षा गरिएको भए पनि झनै बढेको बताउँदै दशैंको महत्व पनि खसीको व्यापारले झल्काएको बताए ।
हुम्ला जिल्लामा मात्र नभएर यसपटक हुम्लाका चार ट्रक खसीबोका पहिलोपटक व्यापारीले पोखरा समेत लगेका थिए ।
दशैंमा खसीको व्यापार वृद्धि भएको उद्योग वाणिज्य संघले पनि जनाएको छ ।
प्रतिक्रिया