काठमाडौं । ब्रिटिश एजुकेसन ग्रुपअन्तर्गतको ब्रिटिश मोडल कलेज (बीएमसी) ले क्याम्ब्रिज इन्टरनेसनल एएस एन्ड ए लेभलको मे–जुन २०२६ परीक्षामा उत्कृष्ट नतिजा हासिल गरेको छ।
कलेजका अनुसार परीक्षामा सहभागी १०६ जना विद्यार्थमध्ये ९४ प्रतिशत विद्यार्थी उत्तीर्ण भएका छन्। त्यसमध्ये ७ जना विद्यार्थीले लगातार ए स्टार र ३३ जना विद्यार्थीले लगातार ए ग्रेड हासिल गरेका छन्।
कलेजले यो उपलब्धिलाई विद्यार्थीको निरन्तर मेहनत, शिक्षकहरूको समर्पण तथा अभिभावकको सहयोगको परिणामका रूपमा लिएको छ। विद्यार्थीलाई आफ्नो क्षमता पहिचान गरी शैक्षिक क्षेत्रमा उत्कृष्ट प्रदर्शन गर्न प्रेरित गर्ने वातावरणले पनि यस सफलतामा महत्वपूर्ण योगदान गरेको कलेजको भनाइ छ।
ब्रिटिश एजुकेसन ग्रुपका हेड अफ स्कुल्स राजन कुमार राईले उत्कृष्ट नतिजाका लागि विद्यार्थीहरूलाई बधाई दिँदै शिक्षक तथा अभिभावकप्रति आभार व्यक्त गरेका छन्।
उनले यो उपलब्धि बीएमसी तथा समग्र ब्रिटिश एजुकेसन ग्रुपका लागि गौरवको विषय भएको बताए। विद्यार्थीमा शैक्षिक उत्कृष्टता, आत्मविश्वास र उच्च महत्वाकांक्षा विकास गर्ने वातावरण निर्माण गर्ने संस्थाको प्रतिबद्धतालाई नतिजाले थप बलियो बनाएको उनको भनाइ छ।
“विद्यार्थीहरूको सफलतामा योगदान पुर्याउने समर्पित शिक्षक तथा सहयोगी अभिभावकप्रति आभार व्यक्त गर्दछु। यो उपलब्धिले विद्यार्थीलाई आगामी शैक्षिक तथा व्यावसायिक यात्राका लागि आवश्यक आधार तयार पार्न हामीले गर्दै आएको प्रयासलाई प्रतिबिम्बित गर्छ,” राईले भने।
कलेजका अनुसार ए लेभल पूरा गरेका विद्यार्थीका लागि यो नतिजा उच्च शिक्षातर्फ अघि बढ्ने तथा भावी करियर निर्माण गर्ने यात्राको महत्वपूर्ण आधार बनेको छ।
बीएमसीले परीक्षामा सहभागी सबै विद्यार्थीलाई बधाई दिँदै उनीहरूको आगामी शैक्षिक यात्राका लागि शुभकामना व्यक्त गरेको छ। साथै, उत्कृष्ट नतिजाका लागि योगदान पुर्याउने शिक्षक, अभिभावक तथा सम्पूर्ण कलेज परिवारप्रति धन्यवाद व्यक्त गरेको छ।
प्रतिक्रिया