सुनसरीमा प्रहरीको गोली लागेर युवकको मृत्यु, ११ जना घाइते

सुनसरी । सुनसरीको देवानगञ्ज गाउँपालिका–३, कप्तानगञ्जमा गएराति दुई समूहबीच भएको झडप नियन्त्रण गर्न सशस्त्र प्रहरीले चलाएको गोली लागेर एक युवकको मृत्यु भएको छ । घटनामा ११ जना घाइते भएका छन् ।

प्रहरी इन्स्पेक्टर प्रकाश राईका अनुसार गोली लागेर गम्भीर घाइते भएका देवानगञ्ज गाउँपालिका–३ का २४ वर्षीय ओमप्रकाश मेहताको उपचारका क्रममा विराटनगरस्थित न्युरो अस्पतालमा मृत्यु भएको हो ।

इन्स्पेक्टर राईले मेहतालाई तत्काल उपचारका लागि अस्पताल लगिए पनि चिकित्सकले मृत घोषणा गरेको बताए ।

प्रहरीका अनुसार एक समूह डीजे बजाएर नाचिरहेका बेला अर्को समूह आएर विवाद भएको थियो । उक्त विवादले उग्र रूप लिएपछि झडप भएको प्रहरीले जनाएको छ ।

झडप हिंसात्मक बन्दै गएपछि अवस्था नियन्त्रणमा लिन सशस्त्र प्रहरीले गोली चलाएको प्रहरीको भनाइ छ ।

गोली लागेर ८ जना घाइते भएका छन् भने झडपका क्रममा तीन जना प्रहरी पनि घाइते भएका छन् ।

घाइतेहरूको विराटनगरस्थित विभिन्न अस्पतालमा उपचार भइरहेको छ । घटनाको थप अनुसन्धान भइरहेको प्रहरीले जनाएको छ ।