वाणगंगा नदीमा फसेका ७ जनाको सकुशल उद्धार

कपिलवस्तु । कपिलवस्तुको वाणगंगा नदीमा फसेका ७ जना युवकको सकुशल उद्धार गरिएको छ ।

जिल्ला प्रहरी कार्यालय कपिलवस्तुका अनुसार शनिबार दिउँसो वाणगंगा नगरपालिका–८ बालापुरस्थित वाणगंगा खोलामा पौडी खेल्न गएका क्रममा अचानक खोलाको बहाव बढेपछि उनीहरु खोलाको बीच भागमा फसेका थिए । घटनाको जानकारी पाएलगत्तै नेपाली सेना, नेपाल प्रहरी र सशस्त्र प्रहरीको संयुक्त विपद् उद्धार टोली घटनास्थल पुगेको थियो ।

उद्धार टोलीले खोलाको बीचमा फसेका सबै सातै जनालाई सकुशल उद्धार गरेको प्रहरीले जनाएको छ ।

उद्धार गरिएकामा वाणगंगा नगरपालिका–४ का १७ वर्षीय सम्राट गिरी, १७ वर्षीय ज्ञानेन्द्र परियार, १८ वर्षीय निर्वाचन नेपाली, १७ वर्षीय कृष्ण तिवारी, १७ वर्षीय मनिष थापा, वाणगंगा–१ बैरियाका १६ वर्षीय विकल्प रेस्मी र वाणगंगा–८ त्रिलोक मार्गका १७ वर्षीय सुवास घिमिरे रहेका छन् ।

प्रहरीले वर्षायाममा खोलानाला तथा नदीमा पानीको बहाव बढ्ने भएकाले सावधानी अपनाउन आग्रह गरेको छ ।