सर्वोच्च अदालत प्रशासनविरुद्ध बार एसोसियसनद्वारा आन्दोलनको घोषणा

काठमाडौं । सर्वोच्च अदालत प्रशासनको निर्णयविरूद्व नेपाल बार एसोसियसनले आन्दोलनको घोषणा गरेको छ ।

कामु प्रधानन्यायाधीस सपना प्रधान मल्लको निर्देशनपछि पनि सर्वोच्च प्रशासनले निवेदन दर्ता नगरेपछि बार आन्दोलनमा उत्रिएको हो । बारले मंगलबार दिउँसो सवा १ बजे बार एसोसियसन परिसरमा लालटिन बालेर विरोध जनाउने भएको छ।

थप कार्यक्रमहरू सल्लाहकार तथा एकाइबाट प्राप्त सुझावहरूअनुसार सञ्चालन गर्दै जाने बारले विज्ञप्तिमार्फत् जनाएको छ। यस्तै बारले प्रतिनिधिसभा बैठकमा केही सांसदहरूले अदालतमा विचाराधीन विषयमा संसदमा छलफल गर्न बन्देज गर्ने लगायतका धारणा राखेकामा पनि आपत्ति जनाएको छ ।

त्यस्ता अभिव्यक्तिहरू संसदीय अभिलेखबाट हटाउन र यस्ता घटनाहरू दोहोरिन नदिनका लागि सांसदहरूलाई स्पष्ट आदेश दिन सभामुखसमक्ष पनि बारले अनुरोध गरेको हो ।