वीरगञ्ज नाका हुँदै भित्रिए दुई हजारभन्दा बढी एलपी ग्यासका बुलेट

काठमाडौं । पर्साको वीरगञ्ज नाका हुँदै करिब डेढ महिनाको अवधिमा दुई हजार १३६ वटा एलपी ग्यासका बुलेट भित्रिएका छन् । पछिल्लो समय पश्चिम एसियाका देशमा देखिएको संकटसँगै नेपालसहित अन्य मुलुकमा एलपी ग्यासको अभाव देखिएको छ ।

यसैबीच, वीरगञ्ज नाका हुँदै फागुनमा मात्रै एक हजार ५६० वटा एलपी ग्यासका बुलेट भित्रिएका भन्सार कार्यालयले जनाएको छ । कार्यालय मातहत पर्ने एकीकृत भन्सार जाँचचौकीको व्यवस्थापन गर्दै आएका टीआरएस हिमायन लजी पार्कका अपरेसन हेड गणेश घिमिरेले गत फागुनदेखि १३ चैतसम्मको अवधिमा दुई हजार १३६ वटा एलपी ग्यासका बुलेट वीरगञ्ज नाका हुँदै भित्रिएका जानकारी दिए ।

’गत माघमा एक हजार ४०३ वटा एलपी ग्यासका बुलेट भित्रिएका थिए’, उनले भने, ’१३ चैतसम्म पनि ५७६ वटा बुलेट भित्रिएका छन् ।’

वीरगञ्ज भन्सार कार्यालयका अनुसार चालु आवको सात महिनामा यो नाका हुँदै २० अर्ब ८५ करोड मूल्य पर्ने २० करोड २८ लाख २० हजार ९३२ किलो एलपी ग्यास आयात भएको छ । गत आवको सात महिनाको अवधिमा २४ अर्ब छ करोड मूल्य पर्ने २१ करोड ४२ हजार ७८१ किलो एलपी ग्यास आयात भएको थियो ।