पशुपतिनाथदेखि झारखण्डको बैद्यनाथधामसम्म द्रुतमार्ग निर्माण गर्दै भारत

काठमाडौं । भारतले पशुपतिनाथ देखि बिहार हुँदै झारखण्डको बैद्यनाथधामसम्म द्रुतमार्ग निर्माण गर्ने भएको छ । बिहारका सडक निर्माण मन्त्री डा. दिलीप जयसवालले मंगलबार विधानसभामा उक्त विषयमा जानकारी दिएका हुन् ।

सभामा आर्थिक वर्ष २०२६/२७ को लागि सडक निर्माण विभागको ८,२६० करोडभन्दा बढीको बजेट प्रस्तुत गर्दै जयसवालले भने “प्रस्तावित २५० किलोमिटर लामो ’पशुपतिनाथ–बैद्यनाथ धाम हाई–स्पीड करिडोर’ काठमाडौँबाट निस्कनेछ, भीमनगर र वीरपुर हुँदै बिहारको सुपौल जिल्लामा भारतमा प्रवेश गर्नेछ । त्यसपछि यो मधेपुरा, सहरसा, खगरिया, मुंगेर र बाँका जिल्ला हुँदै झारखण्डको देवघर जिल्लाको वैद्यनाथ धाम पुग्नेछ ।”

सात सीमावर्ती जिल्लाहरूमा ५५४ किलोमिटर सडक निर्माण गरिने
मन्त्री डा. दिलीप जयसवालले भारत–नेपाल सीमा सडक परियोजना अन्तर्गत बिहारमा कुल ५५४.०८ किलोमिटर सडक निर्माण भइरहेको पनि जानकारी दिए । मन्त्रीका अनुसार यो परियोजना सात सीमावर्ती जिल्लाहरू हुँदै जानेछ । पश्चिम चम्पारण, पूर्वी चम्पारण, सीतामढी, मधुबनी, सुपौल, अररिया र किशनगंज। यो मार्ग पश्चिम चम्पारणको मदनपुरबाट सुरु हुनेछ र किशनगंज जिल्लाको गलगलियामा समाप्त हुनेछ ।

जेपी गंगा मार्ग आरा र भागलपुर बीच विस्तार गरिने
परियोजनाहरू सम्पन्न हुँदा सीमावर्ती क्षेत्रहरूमा यात्रालाई सहज बनाउने मात्र नभई व्यापार, पर्यटन र सुरक्षाको हिसाबले राज्यलाई महत्वपूर्ण फाइदा पनि हुनेछ । जेपी गंगा मार्गलाई आराबाट गंगा नदीको दक्षिणी किनारमा भागलपुरसम्म विस्तार गर्ने योजना छ ।