हेटौंडा । नेकपा (एमाले)का मकवानपुर निर्वाचन क्षेत्र नम्बर २ का उम्मेदवार महेशकुमार बर्तौलाले आफूलाई किसानका समस्या र पीडा राज्यको नीति निर्माण तहसम्म पुर्याउने ‘भरिया’को रूपमा चित्रण गरेका छन् । निर्वाचन लक्षित कार्यक्रमका क्रममा सोमबार मकवानपुरगढी गाउँपालिकाका विभिन्न वडाहरूमा मतदातासँग अन्तरक्रिया गर्दै बर्तौलाले यस्तो बताएका हुन् ।
आज बिहानैदेखि मकवानपुरगढी–५ र ६ का डुम्रेकुना, झल्ला, बुँदल, धादिङ, भालुखोला, बागदली र ज्यामिरे लगायतका क्षेत्रमा पुगेर उनले स्थानीयका समस्या सुन्नुका साथै आफ्नो भावी योजनाबारे प्रष्ट पारे ।
बर्तौलाको भनाइलाई उदृत गर्दै एमालेका निर्वाचन फोकल पर्सन आशिष अस्लामीले भने– बर्तौलाको अघिल्लो ३२ महिने कार्यकालमा संसद्मा मल, बीउ, तरकारीको उचित मूल्य, खसीबोकाको बजारीकरण र दुग्ध किसानको भुक्तानीका लागि पहिलो पटक र निरन्तर संसदमा आवाज उठाएको हो ।
अन्तरक्रियाका क्रममा मकवानपुरगढी–६ का पूर्ववडाध्यक्ष टीका दाहालले सामरी बस्तीको सुरक्षा, अस्पताल व्यवस्थापन र शीतभण्डार सञ्चालनमा बर्तौलाले आगामी दिनमा महत्त्वपूर्ण भूमिका खेल्नुपर्ने सुझाव दिए ।
त्यस्तै, मकवानपुरगढी गाउँपालिकाको पूर्वअध्यक्ष विदुर हुमागाईँले सामरी पुलदेखि डुम्रेकुनासम्मको सडक पूर्वाधार निर्माणमा बर्तौलाको पहलको प्रशंसा गर्दै आगामी फागुन २१ गतेको निर्वाचनमा उनलाई जिताउन अपिल गरे । अर्का स्थानीय नानीराम तिमल्सिनाले बर्तौला ‘डबल मास्टर्स’ र अधिवक्ता समेत रहेकाले कानुन निर्माणका लागि सबैभन्दा योग्य उम्मेदवार भएको दाबी गरे ।
कार्यक्रममा समानुपातिक उम्मेदवार मेम्बर लो तामाङले आफ्नै जन्मभूमिबाट पार्टीले उम्मेदवार बनाएकोमा खुसी व्यक्त गर्दै मकवानपुरगढीको गौरव बढाउन सूर्य चिह्नमा मतदान गर्न आग्रह गरे ।
भेटघाटकै क्रममा उम्मेदवार बर्तौलाले शिक्षा र पूर्वाधारको क्षेत्रमा आफूले गरेका कामहरूको विवरण समेत प्रस्तुत गरे । उनले जाल्पा देवी माध्यमिक विद्यालयको भवन निर्माणका लागि १ करोड ६२ लाख, १७ करोडको मकवानपुरगढी बृहत् खानेपानी आयोजना र सरङ्गपुरमा १४ करोडको पक्की पुल निर्माण जस्ता ठूला योजनाहरू आफ्नै पहलमा अघि बढेको बताए । आगामी दिनमा सामरी खोला तटबन्धन र अधुरा विकास निर्माणका कार्यहरूलाई पूर्णता दिने प्रतिबद्धता जनाउँदै उनले समग्र मकवानपुरगढीबासीलाई एमालेको पक्षमा मतदान गर्न अपिल गरे ।
अभियानमा नवराज तिमल्सिना, भगवती पुडासैनी, रामजी सापकोटा, विष्णु सिलवाल लगायतका नेता तथा कार्यकर्ताहरूको बाक्लो उपस्थिति रहेको थियो ।
प्रतिक्रिया