शिवजी घाम ताप्न जाँदै, पशुपतिनाथमा धनुर्मासको विशेष पूजा-आराधना

काठमाडौं । पशुपतिनाथ मन्दिरमा धनुर्मासको अवसरमा विशेष पूजाआराधना सम्पन्न गरिएको छ। गएराति १२ बजेदेखि आज शुक्रबार बिहान ६:३० बजेसम्म पशुपतिनाथ मन्दिरमा वैदिक विधिअनुसार विशेष पूजाआजा गरी धनुर्मास पूजा मनाइएको हो।

धार्मिक विश्वासअनुसार धनुर्मास पूजा सम्पन्न भएपछि आज भगवान शिव कैलाश पर्वतमा घाम ताप्न जानुहुन्छ भन्ने मान्यता रहेको छ। यही विश्वासका आधारमा प्रत्येक वर्ष धनुर्मासको अन्त्यमा पशुपतिनाथ मन्दिरमा विशेष पूजा, आराधना र दर्शनको व्यवस्था गरिँदै आएको छ।

धनुर्मास पूजा अवलोकन तथा दर्शनका लागि आज बिहानैदेखि पशुपतिनाथ क्षेत्रमा भक्तजनहरूको उल्लेख्य उपस्थिति रहेको थियो। भक्तजनहरूले भगवान शिवको आराधना गर्दै सुख, शान्ति र समृद्धिको कामना गरेका छन्।

पौराणिक कथन र धार्मिक परम्पराअनुसार भगवान शिव धनुर्मासपछि कैलाश पर्वतमा गई घाम ताप्नुहुने विश्वास रहेको छ, जसले शीत ऋतुको समाप्ति र नयाँ ऊर्जा प्राप्तिको संकेत गर्ने धार्मिक अर्थ राख्छ।