अहिलेको अवस्थामा चुनाव हुँदैन : पार्वत गुरुङ

काठमाडौं, २९ असोज । नेकपा (एमाले)का पोलिटब्युरो सदस्य पार्वत गुरुङले एमाले चुनावबाट कहिल्यै पनि नभाग्ने पार्टी भएको बताएका छन् ।

पार्टी केन्द्रीय कमिटी बैठक स्थलमा सञ्चारकर्मीले सोधको प्रश्नको जवाफ दिँदै गुरुङले जेलबाट कैदीहरू फरार भएका, सुरक्षा अवस्था अति कमजोर भएको, हतियार लुटिएको अहिलेको अवस्थामा चुनाव नहुने स्पष्ट पारे । संसद् पुनर्स्थापना हुनुपर्छ भन्ने मान्यतामा एमाले रहेको उनले बताए । ‘चुनावबाट एमाले भाग्दैन, तर अहिले चुनाव गर्ने परिस्थिति छैन’, उनले भने ।

भदौ २३, २४ को घटना निकै दुखद् घटना भएको बताउँदै उनले यो घटनाबाट सधैं निराश भएर पनि बस्न नसकिने बताए । जेनजीले उठाएका मागमा आफ्नो समर्थन भएको बताउँदै आन्दोलनको नाममा भएको हत्या, हिंसा र आतङ्कलाई स्विकार्न नसकिने उनको धारणा छ ।

जेनजीले पनि यस्तो कलङ्क व्यहोर्नु नहुने बताउँदै गुरुङले जेनजीले यस विषयमा आफ्नो धारणा सार्वजनिक गर्नुपर्ने बताए । अब पार्टी र देशलाई कसरी अघि बढाउने भन्ने सोच र विचारका साथ अघि बढ्नु पर्ने उनको धारणा छ । सबै क्षेत्रमा गिरेको मनोबल उठाउने गरी एमाले अघि बढ्ने र सोही अनुसारको दृष्टिकोण केन्द्रीय कमिटी बैठकमा आइरहेको उनले जानकारी दिए ।

एमालेले विधान महाधिवेशन सकिसकेको बताउँदै गुरुङले मंसिरमा प्रस्ताव गरिएको पार्टीको केन्द्रीय महाधिवेशन नियमित प्रक्रिया भित्रै रहेको जानकारी दिए । भदौ २३ र २४ को घटना नभएको भए पनि एमालेको महाधिवेशन मंसिरमा नै गर्ने गरी तयारी भइरहेको गुरुङले बताए ।