पहलगाम घटना : प्रधानमन्त्री ओलीले गरे भारतीय समकक्षी मोदीसँग टेलिफोनमा कुराकानी

काठमाडौं, १० बैशाख । प्रधानमन्त्री केपी शर्मा ओलीले भारतीय समकक्षी नरेन्द्र मोदीसँग टेलिफोनमा कुराकानी गरेका छन् ।

प्रधानमन्त्री ओलीले आज कस्मिरको पहलगाममा भएको घटनाकाबारेमा समकक्षी मोदीसँग कुराकानी गरेका हुन् । प्रधानमन्त्री ओलीले घटनाप्रति दुःख व्यक्त गर्दै आतंकवादविरूद्व आफूहरू साथमा रहेको बताएका थिए ।

‘दुई देशका प्रधानमन्त्रीबीच कश्मीरमा भएको आतंकवाद हमलाको विषयमा कुराकानी भयो,’ ओलीको सचिवालयले भन्यो, ‘प्रधानमन्त्री ओलीले घटनाबारे समवेदना व्यक्त गर्दै आकंवादीविरुद्ध हामी एकै ठाउँमा छौँ। जुनसुकै रुप भए पनि आतंकवाद भनेको साझा सत्रु हो। हामी सँगै छौँ भन्नु भयो।’

कुराकानीका क्रममा मोदीले आतंकवादीलाई कारबाही गर्न भारत सरकार प्रतिवद्व रहेको बताएका छन् ।

‘उक्त आतंकवादविरुद्धको लडाइामा भारत र नेपाल एकसाथ उभिएका छन्’, भारतीय विदेश मन्त्रालयका प्रवक्ता रणधीर जैसवालले भने, ‘प्रधानमन्त्री मोदीले एक युवा नेपाली नागरिकको मृत्यु भएको प्रति समवेदना व्यक्त गर्नुभएको छ ।’

प्रधानमन्त्री ओलीले पनि सामाजिक सञ्जाल एक्समार्फत भारतीय प्रधानमन्त्री मोदीसँग आतंकवादी हमलाबारे कुराकानी भएको उल्लेख गरेका छन् ।