भैरहवा विमानस्थलबाट नियमित रूपमा ४ विमान कम्पनीले उडान भर्नेछ : प्रधानमन्त्री

काठमाडौं, ७ चैत । प्रधानमन्त्री केपी शर्मा ओलीले भैरहवा विमानस्थलबाट चारवटा विमान कम्पनीले नियमित उडान गर्ने जनाएका छन् ।

प्रतिनिधि सभाको जारी बैठकमा बोल्दै प्रधानमन्त्री ओलीले बुटवलबाटै श्रम स्वकृति दिने व्यवस्था मिलाएको जानकारी दिँदै गौतम बुद्ध अन्तर्राष्ट्रिय विमानस्थलबाट अब नियमित चार अन्तर्राष्ट्रिय उडान हुने बताएका हुन् ।

‘हाल अलजजिरा, फ्लाई दुवई, एअर एसिया र नेपाल एअरलाइन्सले उक्त विमानस्थलबाट अन्तर्राष्ट्रिय उडान सञ्‍चालन गरिरहेका छन्, श्रम तथा रोजगार कार्यालय बुटवलबाट श्रम स्वीकृति प्रदान गर्न सुरु भएको छ,’ प्रधानमन्त्री ओलीले भने, ‘साथै, अध्यागमन, मुद्रा सटही लगायतका बैंकिङ सुविधा विमानस्थलमै प्रदान गर्ने व्यवस्था मिलाइएको र भविष्यमा उक्त विमानस्थललाई पूर्ण क्षमतामा सञ्‍चालन गर्नेगरी काम भइरहेको छ ।’

गौतमबुद्ध अन्तर्राष्ट्रिय विमानस्थलको दिगो सञ्‍चालनका लागि सरकारले सम्बद्ध निकायहरूसँग छलफल गरी कार्ययोजना बनाई कार्यान्वयन गरिरहेको समेत उनले जानकारी दिए । ‘यात्रु सेवा शुल्कमा छुट, ग्राउन्ड ह्यान्डलिङ, ल्यान्डिङ, पार्किङ एन्ड नेभिगेसन शुल्कमा छुट जस्ता सहुलियत एवम् प्रोत्साहनका कार्यक्रमहरू सञ्‍चालनमा ल्याएको छ,’ प्रधानमन्त्री ओलीले भने ।

लुम्बिनी प्रदेशमा सुविधा सम्पन्न बर्थिङ हस्पिटल निर्माण गर्नका लागि नेपाल सरकार, थाइल्याण्ड अन्तर्राष्ट्रिय सहयोग नियोगको सहकार्यमा सम्भाव्यता अध्ययन भइरहेको प्रधानमन्त्री ओलीले जानकारी दिए । लुम्बिनी क्षेत्रको अपार धार्मिक एवम् पर्यटकीय सम्भावनालाई मध्यनजर गर्दै सन् १९७८ मा डिजाइन स्वीकृत भएको लुम्बिनी गुरुयोजना अनुसार निर्माण कार्यहरू भइरहेको जानकारी समेत गराएका छन् ।