ट्रम्प र जेलेन्स्कीबीच चर्को बहस, ट्रम्पले भने– रुससँग सम्झौता गर्नुपर्छ, नत्र तेस्रो विश्वयुद्ध हुनेछ

काठमाडौं, १७ फागुन । अमेरिकी राष्ट्रपति डोनाल्ड ट्रम्पले युक्रेनले रुससँग युद्धविराम सम्झौता गर्नुपर्ने बताएका छन् । उनले युद्ध गलत दिशामा गइरहेको बताउँदै युक्रेनले रुससँग युद्धविराम सम्झौता गर्नुपर्ने बताएका हुन् ।

मिडिया रिपोर्टका अनुसार ह्वाइट हाउसमा भएको कुराकानीका क्रममा अमेरिकी राष्ट्रपति ट्रम्प र युक्रेनी राष्ट्रपति भोलोदिमिर जेलेन्स्कीबीचको बहस यति चर्कियो कि मिडियालाई त्यहाँबाट निकाल्नुपरेको थियो ।

कुराकानीका क्रममा ट्रम्पले रुस र युक्रेन आफ्ना लागि बराबर भएको बताएका थिए । ‘युद्ध रोक्नु पर्छ, नत्र तेस्रो विश्वयुद्ध हुनेछ ।’ ट्रम्पले भने । यसबारे जेलेन्स्कीले युद्ध पुटिनले सुरु गरेको बताए । ‘उनीहरुबाट पनि युद्धको खर्च असुल्नु पर्छ । रसियाले युद्धको मूल्य चुकाउनु पर्छ ।’ जेलेन्स्कीले भने ।

मिडिया रिपोर्टका अनुसार वार्ताका क्रममा दुई नेताहरूले युक्रेनमा वर्षौं लामो युद्धमा जारी युद्धविराम वार्ताको भागको रूपमा अमेरिकाको लागि खनिज सम्झौताको बारेमा पनि छलफल गरे । तर, जेलेन्स्कीले युद्धविरामको विरोध गर्दै कुनै सम्झौता नहुने स्पष्ट रुपमा बताए ।

कीभ पोस्टका अनुसार जेलेन्स्कीले ट्रम्पको युद्धविरामको विरोध गरे र भने, ‘हामीलाई युद्धविराम मात्र आवश्यक छैन । हामीले यसअघि पनि यस्तो गरेका छौँ । पुटिनले तपाईंको राष्ट्रपतिको समयमासहित २५ पटक यसको उल्लङ्घन गरेका छन् ।’

ट्रम्प र जेलेन्स्कीबीच चर्को बहस

अमेरिकी मिडिया रिपोर्टका अनुसार ओभल अफिसमा राष्ट्रपति ट्रम्प, उपराष्ट्रपति जेडी भान्स र राष्ट्रपति जेलेन्स्कीबीच निकै चर्को बहस भएको थियो । जेलेन्स्कीले भ्यान्सलाई युक्रेन भ्रमण गर्न आग्रह गरे, र भ्यान्सले उनलाई युद्धलाई बढावा दिएको आरोप लगाए ।

ट्रम्पले जेलेन्स्कीलाई भने, ‘तपाईसँग अहिलेसम्म कार्ड छैन । तपाईं तेस्रो विश्वयुद्धमा जुवा खेल्दै हुनुहुन्छ ।’ ट्रम्पले भने, ‘तपाईसँग कुनै विकल्प छैन, तपाई तेस्रो विश्वयुद्धको खतरासँग खेल्दै हुनुहुन्छ ।’

यति मात्र होइन ट्रम्पले जेलेन्स्कीलाई गाली गर्दै भने ‘यदि हामी यहाँ छौँ भने तपाई सुरक्षित हुनुहुन्छ, तपाई हामीलाई आदेश दिने स्थितिमा हुनुहुन्न ।’

ट्रम्पले भनेका थिए, ‘यदि हामीले तपाईंलाई ३५० अर्ब डलरको हतियार नदिएको भए रुसले तपाईंलाई जितिसक्ने थियो ।’ ट्रम्पले युक्रेनले आफ्नो देश र देशवासीको ख्याल नगरेको बताएका छन् । ‘तपाईंले हामीलाई धन्यवाद दिनुपर्छ ।’ ट्रम्पले भने । त्यस कुराकानीमा अवरोध गर्दै उपराष्ट्रपति भान्सले युक्रेनले आजसम्म धन्यवाद नदिएको टिप्पणी गरेका थिए ।

जेलेन्स्की ह्वाइट हाउस पुग्दा ट्रम्प उनलाई स्वागत गर्न आएका थिए ।