पाचौँ पाँचथर गोल्डकप फुटबल फागुन २४ देखि

पाँचथर, १४ माघ । पाचौँ पाँचथर गोल्डकप फुटबल प्रतियोगिता आगामी फागुन २४ देखि चैत २ गतेसम्म सञ्चालन हुने भएको छ ।

आयोजक पाँचथर क्लबले आइतबार पाँचथरको फिदिममा पत्रकार सम्मेलनको आयोजना गरी प्रतियोगिताबारे जानकारी दिएको हो ।

फिदिम माध्यमिक विद्यालयको खेलमैदानमा हुने प्रतियोगितामा स्वदेश र विदेशका गरी आठ टोली सहभागी हुने प्रतियोगिता आयोजक पाँचथर क्लबले जनाएको छ । ‘ए’ डिभिजन खेल्ने केही क्लबसहित दुई विदेशी टोली स्पर्धा गर्न आउने क्लबका अध्यक्ष कमल तुम्रोकले जानकारी दिए ।

प्रतियोगितामा प्रथम हुने टोलीले ११ लाख एक हजार एक सय ११ रुपैयाँ र उपविजेतालाई पाँच लाख ५५ हजार पाँच सय ५५ रुपैयाँ नगद पुरस्कार प्रदान गरिनेछ । प्रतियोगिताका निम्ति ७० लाख रुपैयाँ विनियोजन भएको अध्यक्ष तुम्रोकले बताए ।

चौथो पाँचथर गोल्डकपको उपाधि त्रिभुवन आर्मी फुटवल क्लबले जितेको थियो ।