धनुषामा घरकै शौचालय पछाडि गाडिएको अवस्थामा महिलाको शव फेला

धनुषा, ११ पुस । धनुषाको मिथिला नगरपालिका-३ हरिहरपुरमा एक महिलाको शव गाडिएको अवस्थामा फेला परेको छ ।

हरिहरपुरस्थित मुसहरी टोल निवासी ४८ वर्षीया रेशमीदेवी मुखियाको शव बुधबार राति उनकै घरको शौचालय पछाडि गाडिएको अवस्थामा भेटिएको हो ।

रेशमीदेवी बुधबार बिहान खाना खाएपछि घरबाट बेपत्ता भएकी थिइन् । उनको खोजी गर्ने क्रममा बुहारीले राति घर पछाडिको जमिनमा गाडिएको अवस्थामा शव फेला पारेको इलाका प्रहरी कार्यालय महेन्द्रनगरका प्रहरी निरीक्षक सोनु साहले जानकारी दिए ।

घटनाको अनुसन्धानका लागि मृतक रेशमीदेवीका श्रीमान् दशैया मुखिया बिनलाई प्रहरीले नियन्त्रणमा लिएको छ ।

प्रहरी निरीक्षक साहका अनुसार दशैयालाई गएराति नै इलाका प्रहरी कार्यालय महेन्द्रनगरमा ल्याइएको थियो ।

प्रहरीले शवलाई पोष्टमार्टमका लागि प्रादेशिक अस्पताल जनकपुर पठाएको र घटनाबारे थप अनुसन्धान भइरहेको जनाएको छ ।