नेपालबाट बंगलादेश बिजुली निर्यात सुरु

काठमाडौं, ३० कार्तिक । नेपालबाट बंगलादेशमा विद्युत निर्यात सुरू भएको छ ।

ऊर्जामन्त्री दिपक खड्का, भारतका विद्युत् मन्त्री मनोहरलाल खट्टर र बंगलादेशका ऊर्जा जलस्रोत मन्त्रालयका सल्लाहकार मोहमद फजुल कबिरले भर्चुअल माध्यमबाट बंगलादेश विद्युत् निर्यातको औपचारिक सुरुवात गरेका हुन् ।

शुक्रबारदेखि ४० मेगावाट बिजुली बंगलादेश निर्यात हुन थालेको हो । यो पटक आज मात्रै विद्युत बंगलादेश निर्यात हुनेछ । नेपाल विद्युत् प्राधिकरणले २५ मेगावाट क्षमताको त्रिशूली र २२ मेगावाट क्षमताको चिलिमे जलविद्युत् आयोजनाको बिजुली बंगलादेश निर्यात गरेको छ।

नेपालबाट निर्यात गरिएको बिजुली मुजफ्फरपुरदेखि भारतको प्रसारणलाइनमार्फत बेहरामपुर–भेडामारा ४०० केभी प्रसारणलाइनबाट बंगलादेश पुग्नेछ। नेपाल र बंगलादेशबीच ५ वर्षको लागि निर्यात सम्झौता भएको हो ।