गृह सचिव र महानिरीक्षक दार्चुला पुगेर फर्किए, तर्सियो संसदीय टोली

दैनिक नेपाल २०८१ वैशाख २६ गते १७:३६

काठमाडौं, २६ बैशाख । संसदीय समितिको भ्रमण स्थगित भएपछि गृह सचिव एकनारायण अर्याल र प्रहरी महानिरीक्षक बसन्तबहादुर कुँवर मंगलबार दार्चुलाको टिंकर क्षेत्रको सीमा अवलोकन गरेर फर्किनुभएको छ ।

गृह मन्त्रालयका प्रवक्ता नारायणप्रसाद भट्टराईका अनुसार, सचिव र महानिरीक्षक सुदूरपश्चिमको सीमा क्षेत्रको स्थलगत अवलोकन गरेर हिजै काठमाडौं फर्किनु भएको हो । प्रधानमन्त्री दाहालकै निर्देशनअनुसार उहाँहरु गुप्त रुपमा भ्रमणमा निस्किनु भएको थियो । दार्चुला जाने अन्तिम तयारी भैसकेको संसदीय टोली अचानक भ्रमण स्थगित भएपछि निकट भविष्यमा जाने भएको छ ।

राज्य व्यवस्था तथा सुशासन समितिले उच्च तहको प्रतिनिधित्व हुनेगरी दार्चुला क्षेत्रको स्थलगत अध्ययन अवलोकन भ्रमणको तयारी गरेको थियो । तर भ्रमणका लागि निर्धारित मिति पटक पटक गरी पाँच पटक सरेर अन्तिम समयमा स्थगित भएपछि बजेट अधिवेशनको अवधिमा जाने सहमति भएको समितिका एक सदस्यले जानकारी दिनुभयो ।

समितिको टोली सुरुमा वैशाख १४ मा जाने मिति तय भएको थियो । त्यसपछि वैशाख २३, २४ र २५ गते गर्दै विभिन्न कारण देखाउँदै सारिएपछि प्रधानमन्त्री पुष्पकमल दाहालकै आग्रहमा पर्सी २८ गतेबाट सुरु हुने बजेट अधिवेशन चलेकै अवधिभित्र दार्चुला जाने सहमति भएको बुझिएको छ ।

कारण बन्यो चुच्चे नक्शा

संसदीय टोलीको दार्चुला भ्रमण स्थगित हुनाको मुख्य कारण थियो नेपालको चुच्चे नक्शा । नेपाल राष्ट्र बैंकले सय रुपैंयाँको नोटमा नेपालको पछिल्लो चुच्चे नक्शा छाप्ने भनेर गरेको तयारी नै भ्रमण स्थगितको कारण हो । सयको नोटमा त्यो नक्शा छाप्ने तयारीको सूचना सार्वजनिक प्रचारमा आएपछि तत्कालै भारतले विदेशमन्त्री तहमा प्रतिक्रिया जनाएको थियो ।

विदेशमन्त्री एस जयशंकरले नेपालले एकतर्फी रुपमा चुच्चे नक्शा छाप्दैमा यथार्थ परिवर्तन हुन नसक्ने भनेर स्पष्ट प्रतिक्रिया जनाउनु भएको थियो । त्यसपछि भारतको प्रतिक्रियाबारे प्रधानमन्त्रीले सम्बन्धित अधिकारीहरुसँग अनौपचारिक परामर्श गर्नुभएको थियो । त्यसपछि संसदीय समितिको टोली तत्काल दार्चुला जान हतार गर्न नहुने भन्ने निष्कर्ष निकालेपछि अरु नै कारण देखाएर भ्रमण स्थगित गरिएको थाहा भएको छ ।

रक्षामन्त्री हरि उप्रेतीले राज्यव्यवस्था समितिका सभापति रामहरि खतिवडालाई आफू भ्रमणमा जान असमर्थ भएको बताउँदै प्रधानसेनापतिलाई सँगै लिएर जान सुझाउनु भएको थियो । सभापति खतिवडाले भने बजेट अधिवेशन बस्न लागेको र प्रधानमन्त्री पनि जरुरी कार्यमा व्यस्त हुनु परेकाले भ्रमण पर बताउनुभयो । तर बजेट अधिवेशनकालमै भ्रमण हुने उहाँको भनाई छ ।