विराटनगर, १ चैत । शिक्षा सेवी एवं इलामको महेन्द्ररत्न बहुमुखी क्याम्पसका संस्थापक प्रिन्सिपल (प्रमुख) डा. खगेन्द्रनाथ शर्माको निधन भएको छ ।
आज बिहान ३ बजेतिर काठमाडौंमा उहाँको ९० वर्षको उमेरमा निधन भएको इलाम समाज काठमाडौंका राधेश्याम लेकालीले जानकारी दिनुभयो ।
इलामको सूर्याेदय नगरपालिका–११, माघेका खगेन्द्रनाथ २०१७ सालमा २६ वर्षको उमेरमा महेन्द्ररत्न बहुमुखी क्याम्पसको संस्थापक प्रिन्सिपल बन्नुभएको थियो ।
स्थापनाका बेला उहाँले क्याम्पसलाई आफ्नो ४७ रोपनी जग्गा दान गर्नुभएको थियो ।
भारतको सागर विश्वविद्यालयबाट स्नातकोत्तर गरेका उहाँले भारतबाटै विद्यावारिधि गर्नुभएको थियो ।
शर्माका परिवारमा दुई छोरा र एक छोरी छन् । पत्नीको यसअघि नै निधन भइसकेको छ ।
उहाँको आजै काठमाडौंको पशुपति आर्यघाटमा दाहसंस्कार गरिने परिवारले जनाएको छ ।
प्रतिक्रिया