काठमाडौं, ८ माघ । मोहन वैद्य किरण नेतृत्वको क्रान्तिकारी कम्युनिष्ट पार्टी नेपालले बागलुङ बडिगाड गाउँपालिकाका स्वास्थ्य शाखा प्रमुख विपेन्द्र केसीमाथि कालोमोसो दलेको छ ।
आइतबार क्रान्तिकारी कम्युनिष्ट पार्टी नेपाल जिल्ला समिति बागलुङले गाउँपालिका–६ खाल स्थित मध्यपहाडी लोकमार्गमा गाउँपालिका स्वास्थ्य शाखा प्रमुख केसीलाई कालोमोसो दलेको हो ।
क्रान्तिकारी जिल्ला कमिटीले विज्ञप्ति जारी गर्दै म्याद गुज्रेको औषधि खुवाएर बडिगाडका स्थानीयको जीवनमाथि नै खेलबाड गरेको भन्दै कारवाही स्वरूप कालोमोसो दलेको जनाएको छ ।
‘बडिगाड गाउँपालिका अध्यक्ष र स्वास्थ्य शाखा प्रमुखको मिलेमतोमा म्याद सकिएको औषधि खरिद गरी कमिशनको खेलमा विद्यार्थीको स्वास्थ्यमा खेलवाड गरेकोले कारबाही गरिएको हो’, जिल्ला इन्चार्ज अजनवी र संयोजक प्रविणद्वारा जारी विज्ञप्तिमा भनिएको छ ।
गाउँपालिका अध्यक्ष र कर्मचारीको सेटिङमा आर्थिक दुरुपयोग गरी जनताको स्वास्थ्यमाथि खेलबाड गरिएको भन्दै कारबाही गरिएको बागलुङ जिल्ला इन्चार्ज अजनवीले जानकारी दिनुभएको छ । आर्थिक चलखेल सत्ताको दुरुपयोग गरी थप लुटतन्त्र मच्चाउँदै जाने र जनताको आवाजलाई दमन गर्ने कुनै पनि षड्यन्त्र मान्य नहुने भन्दै आगामी दिनमा त्यस्ता गतिविधि नगर्न विज्ञप्तिमार्फत चेतावनी दिएको छ ।
डिउटीमा जाने क्रममा कर्मचारीमा भएको कार्य खेदजनक रहेको गाउँपालिका उपाध्यक्ष भिमसेन वनले बताउनुभयो । ‘कानुनको उल्लघंन गर्दै गरिएको यो कार्य खेदजनक छ । यदि गल्ती नै भएको भए पनि कानुनी तरिकाले अगाडि बढ्न सकिन्थ्यो । तर, डिउटीमा हिँडेको कर्मचारीलाई यसरी आक्रमण गर्नु राम्रो होइन,’ उहाँले भन्नुभयो, ‘आर्थिक चलखेलको विषयमा गाउँपालिकालाई लगाएको आरोपमा कुनै सत्यता छैन ।’
प्रतिक्रिया