नेकपा एसका सचिवालय सदस्यसहित ८७ जना एमालेमा फर्किए

काठमाडौं, २९ पुस । नेकपा (एकीकृत समाजवादी) तनहुँ जिल्ला सचिवालय सदस्य एवं शुक्लागण्डकी नगर कमिटी सचिव दीपक थापा नेतृत्वको टोली नेकपा (एमाले)मा फर्किएको छ । सो पार्टीका विभिन्न ८७ जना नेता कार्यकर्ता एमालेमा समाहित हुनुभएको हो । उहाँहरुलाई एमालेका उपमहासचिव पृथ्वीसुब्बा गुरुङले पार्टीमा स्वागत गर्नुभयो ।

एमाले शुक्लागण्डकी नगर कमिटी तनहुँले आइतबार बेलचौतारामा आयोजना गरेको कार्यक्रममा उहाँहरू एमालेमा समाहित हुनुभएको हो । समाहित हुनेलाई नेता गुरुङले टिका लगाएर पार्टीमा स्वागत गर्नुभएको थियो ।

उहाँहरूलाई पार्टीमा स्वागत गर्दै उपमहासचिव गुरुङले कम्युनिष्ट पार्टी विभाजित हुँदा देश र जनतालाई हानी हुने बताउनुभयो । बलियो कम्युनिष्ट पार्टी र कम्युनिष्ट एकता आजको आवश्यकता भएको उहाँले प्रष्ट पार्नुभयो ।