सर्वोच्च अदालतद्वारा जनयुद्ध दिवसको सार्वजनिक बिदा बदर

काठमाडौं, १३ पुस । सर्वोच्च अदालतले जनयुद्व दिवसको दिन सरकारले राखेको सार्वजनिक बिदा बदर गरेको छ ।

सरकारले फागुन १ गते जनयुद्ध दिवसका दिन सार्वजनिक बिदा दिन सुरू गरेको थियो । जनयुद्ध दिवसमा सार्वजनिक बिदा दिने सरकारको निर्णयविरुद्ध २०७९ चैतमा सर्वोच्च अदालतमा रिट परेको थियो।

न्यायाधीशद्वय आनन्दमोहन भट्टराई र महेश शर्मा पौडेलको संयुक्त इजलासले सरकारको निर्णयलाई बदर गरेको हो ।

‘जनयुद्ध दिवसको अवसरमा भनी देशभर सार्वजनिक बिदा दिने नेपाल सरकारको मिति २०७९/१०/२९ को निर्णय र यस वर्षमासमेत मिति २०५०/११/१ गते सोही बिदा दिने भन्ने निर्णय तथा नेपाल राजपत्र भाग ५ खण्ड ७२ संख्या ६५ मिति २०७९/१२/२ मा प्रकाशित सूचना एवम् सो सन्दर्भमा विभिन्न प्रदेश सरकारबाट भएका निर्णय र सूचनाहरूसमेत उत्प्रेषणको आदेशद्वारा बदर गरिएको छ’, सर्वोच्चको आदेशमा भनिएको छ।