यू–१९ एसिया कप आजदेखि, नेपाल र पाकिस्तान भिड्दै

काठमाडौं, २२ मंसिर । आज शुक्रबारदेखि युएईमा यू–१९ एसिया कप क्रिकेट प्रतियोगिता सुरु हुँदैछ ।

पहिलो खेलमा नेपाल र पाकिस्तानबीच प्रतिस्पर्धा हुँदैछ । खेल नेपाली समय अनुसार बिहान ११ः१५ मा दुबईमा रहेको आइसिसी एकेडेमी ओभल-२ मा सुरु हुनेछ ।

पहिलो खेलमै बलियो टोली पाकिस्तानको सामना गरिरहेको नेपाल जित निकाल्ने लक्ष्यसहित मैदानमा उत्रिनेछ । पाकिस्तान पनि पहिलो खेलमा सहज जित निकाल्ने योजनाका साथ मैदान उत्रिनेछ ।

नेपाल र पाकिस्तान दुवै टोलीमा सिनियर टोलीबाट खेलेका खेलाडी पनि छन् । नेपालको टोलीका कप्तान देव खनाल र अलराउन्डर गुल्सन झाले सिनियर टोलीबाट खेलिसकेका छन् ।

पाकिस्तानका स्पिन अलराउन्डर अरफत मिन्हासले पनि सिनियर टोलीबाट खेलिसकेका छन् । उनले ३ वटा टी–२० आई खेलिसकेका छन् ।

प्रतियोगितामा नेपालसहित ८ देशको सहभागिता छ । नेपाल, भारत, अफगानिस्तान र पाकिस्तान समूह ‘ए’ मा छन् । समूह बी मा यूएई, जापान, श्रीलंका र बंगलादेश छन् ।