नेकपा एस पाल्पाका अध्यक्ष पाण्डेको निधन

रामपुर (पाल्पा), २३ असार । नेपाल कम्युनिस्ट पार्टी (एकीकृत समाजवादी) पाल्पाका जिल्ला अध्यक्ष खिमानन्द पाण्डेको मृत्यु भएको छ ।

बगनासकाली गाउँपालिका–१ पिप्लेस्थित घरबाट उपचारका लागि लुम्बिनी मेडिकल कलेज प्रभास लैजाने क्रममा बाटोमै मृत्यु भएको छ । शुक्रबार साँझ ६ः१५ बजे हृदयघात भई ५२ वर्षीय पाण्डेको उपचारका लागि लुम्बिनी मेडिकल कलेज लगिएकोमा ६ः४५ बजे अस्पतालले मृत्यु घोषणा गरेको पारिवारिक स्रोतले जनाएको छ ।

मृतक पाण्डेको दुई छोरा र श्रीमती छन् । पाण्डेको २६ वर्षीय माहिलो छोराको पनि गत वर्ष हृदयघातबाटै मृत्यु भएको थियो ।  पूर्वएमाले पाल्पाको उपसचिव रहेका पाण्डे पाल्पामा सरल र स्वच्छ छवि बनाएका नेता थिए ।

उनी गत वर्ष सम्पन्न भएको स्थानीय तहको निर्वाचनमा बगनासकाली गाउँपालिकामा उपाध्यक्षको उम्मेदवार बनेका थिए । शनिबार बिहान कालीगण्डकी नदीको राम्दीघाटमा पाण्डेको अन्त्येष्टि गरिँदैछ ।