यूएईलाई नौ रनले हराउँदै नेपाल सोझै विश्वकप छनोटमा

दैनिक नेपाल २०७९ चैत २ गते १७:४५

काठमाडौं, २ चैन । नेपालले आइसिसी विश्वकप लिग–२ त्रिकोणात्मक ओडीआई सिरिजमा युएईलाई डकवर्थ लेविस स्टर्न (डीएलएस) पद्धतिको आधारमा नौ रनले हराउँदै सोझै विश्वकप छनोटमा पुगेको छ ।

योसँगै नेपालले आगमी जुन जुलाईमा जिम्बावेमा हुने एकदिवसीय विश्वकप छनोटमा सिधै स्थान बनाएको छ ।

जितका लागि ३११ रनको विशाल विजयी लक्ष्य पछ्याएको नेपालले ४४ ओभरमा ६ विकेट गुमाउँदै २६९ रन बनाउँदा खेल रोकिएको थियो ।

ब्याड लाइटको कारण खेल डकवर्थ लेविस पद्धतिको आधारमा नेपालले जितेको हो ।

नेपालको जितमा गुलशन झा ४८ बलमा ४ चौका र २ छक्कासहित ५० रनमा क्रिजमा रहे । दीपेन्द्र १० रनमा अविजित रहे । गुलशनले ४२औं ओभरमा तीन चौका र एक छक्का हान्दै कुल २० रन जोडेपछि खेलले नयाँ मोड लिएको थियो ।