काठमाडौं, २८ माघ । नेपाल पत्रकार महासंघका पूर्वअध्यक्षहरुले राष्ट्रिय स्वतन्त्र पार्टीका सभापति एवम् निवर्तमान गृहमन्त्री रवि लामिछानेले सञ्चारमाध्यममाथि लगाएको आरोपहरूको विरोध गरेका छन् ।
लामिछानेको अभिव्यक्तिका विषयमा महासंघले शनिबार काठमाडौंमा आयोजना गरेको छलफल कार्यक्रमा उनीहरुले लामिछानेले सञ्चारमाध्यममाथि गरेको टिप्पणी सामान्य नभएको भन्दै विरोध गरेका हुन् ।
कार्यक्रममा महासंघका पूर्वअध्यक्ष डा. महेन्द्र बिष्टले लामिछानेले अराजक अभिव्यक्ति दिएको भन्दै उनको शैली धम्कीका विषय स्वीकार्य हुन नसक्ने बताए । राज्यले लामिछानेको अभिव्यक्तिलाई नोट गर्नुपर्ने र हिंसा भड्काउने अभिव्यक्तिलाई रोक्नुपर्ने धारणा व्यक्त गरे ।
त्यस्तै महासंघका पूर्वअध्यक्ष शिव गाउँलेले नेपाली प्रेस जगतमाथि लगाइएको लाञ्छनाप्रति लामिछानेले क्षमायाचना गर्नुपर्ने बताए । कसैले धम्की दिदैमा नेपाली प्रेस जगत नहल्लने जिकिर उनको छ ।
त्यस्तै महासंघका बरिष्ठ उपाध्यक्ष रमेश बिष्टले लामिछानेको अभिव्यक्ति सामान्य नभएको र प्रेस जगतका लागि थ्रेट भएको बताए । यस्ता विषयमा चूप लागेर बसे आगामी दिनमा प्रेस जगतमाथिको आक्रमण बढ्दै जाने उनको भनाइ छ ।
कार्यक्रममा महासंघका महासचिव रोशन पुरीले प्रेस क्षेत्रमाथिको हमला कुनै पनि हालतमा स्वीकार्य नहुने भन्दै पत्रकारका सबै संघ संगठनहरुले प्रतिवादको पहल गर्नुपर्ने धारणा व्यक्त गरे ।
हेर्नुहोस् भिडिओ–
प्रतिक्रिया