काठमाडौं, १५ मंसिर । नेपाली कांग्रेसका नेता एवम् काठमाडौँ निर्वाचन क्षेत्र नं १ बाट निर्वाचित प्रतिनिधिसभा सदस्य प्रकाशमान सिंहले मेलम्ची खानेपानी आयोजनास्थलको निरीक्षण गरेका छन् ।
आज बिहीबार मेलम्चीको सुरुङ क्षेत्रमा पुगेका नेता सिंहलगायत टोलीले आयोजनामा भइरकेको काम र समस्यामा बारेमा जानकारी समेत लिएको छ । निरीक्षणका क्रममा सिंहले अहिले पनि कांग्रेसकै नेतृत्वको सरकार रहेकाले यसलाई गति दिएर काठमाडौंमा पानी लैजानुपर्ने बताए ।
आफूले मेलम्ची आयोजनालाई चाँडोभन्दा चाँडो टुंगोमा पुर्याउन निरन्तर चासो दिएको उनले बताएका छन् । आयोजनाका कर्मचारी र अन्यको समस्या समाधानका लागि सरकारको ध्यानाकर्षण गराउने प्रतिबद्धता उनले व्यक्त गरेका छन् ।
मेलम्ची खानेपानी आयोजनाबाट आफूले पाउनुपर्ने तलब नपाएको आयोजनाका कर्मचारीले गुनासो गरेका थिए । आयोजनाका कार्यकारी निर्देशक कमलराज श्रेष्ठले ‘फास्ट ट्रयाक’बाट कर्मचारीको पारिश्रमिक उपलब्ध गराउने कुरामा ध्यान जान जरुरी रहेको बताए ।
यसअघि बुधबारमात्रै खानेपानीमन्त्री उमाकान्त चौधरीले यही मंसिर २७ गतेभित्र मेलम्चीको पानी काठमाडौँमा वितरण गरिने बताएका थिए ।
प्रतिक्रिया