डलरको तुलनामा युरो मजबुत

काठमाडौं, ११ कात्तिक । लगातार उकालो लाग्दै आएको अमेरिकी डलरको मूल्य स्थिर रहँदा युरोपेली देशको साझा मुद्रा युरो भने केही मजबुत देखिएको छ ।

नेपाल राष्ट्र बैंकले आजका लागि तय गरेको मूल्यअनुसार एक अमेरिकी डलरको खरिद मूल्य १३१ रूपैयाँ ६९ पैसा रहेको छ । त्यस्तै बिक्री मूल्य १३२ रूपैयाँ २९ पैसा रहेको छ ।

युरोको भने खरिद मूल्य १३२ रूपैयाँ १८ पैसा रहेको छ भने बिक्री मूल्य १३२ रूपैयाँ ७८ रहेको छ । यस आधारमा अमेरिकी डलरभन्दा झिनोरूपमा युरो अगाडि रहेको छ । बिहीबार पनि अमेरिकी डलरको तुलनामा युरो नै मजबुत देखिएको थियो ।

पछिल्ला दिनमा लगातार अमेरिकी डलरको मूल्यमा देखिएको वृद्धिले घरेलु अर्थतन्त्रमा दबाब परेको थियो । आयातमा केन्द्रित रहेको अर्थतन्त्रमा डलरको मूल्य बढ्दा नकारात्मक प्रभाव देखिएको छ ।

विप्रेषणलगायत केही क्षेत्रमा सकारात्मक प्रभाव पर्ने भए पनि अधिकांश माल वस्तु आयात हुने देशमा त्यसले नकारात्मक असर पर्ने अर्थतन्त्रका जानकारको भनाइ छ ।