दार्जीलिङको पहाडी भेकमा जातीय सांस्कृतिक उत्सवको रुपमा फूलपाती मनाइयो

दैनिक नेपाल २०७९ असोज १७ गते १९:५२

खरसाङ, १७ असोज । हिन्दू नेपालीहरुको बडादसैँको अवसरमा दार्जीलिङको पहाडी भेकमा जातीय सांस्कृतिक उत्सवको रुपमा नवरात्रको सातौ दिन फूलपाती मनाइएको छ ।

कोरोना भाइरसको कारण गएको दुई वर्ष सामान्य तरिकाले मनाइएको दसैँ यसपटक भने समग्र दार्जीलिङको पहाडी भेकमा दसैंको लागि नयाँ जोश र उत्साह सुरु भएको देखिएको छ ।

आइतबार फूलपातीको दिनमा पहाडी भेक दार्जीलिङ, कालेबुङ, खरसाङ, तीनधारे, साथै मदेश खण्डको सिलगढीलगायत विभिन्न ठाउँहरुमा फूलपाती मनाइएको छ । यसैक्रममा सन् १९९८ देखि दार्जीलिङ पहाडको एक मुख्य स्थल तीनधारे क्षेत्रको २० माइल स्थित स्मृति वनमा फूलपातिको शुभ अवसरमा लोक संस्कृतिको कार्यक्रम संस्कृतिक झाँकी साथै लोक नृत्य प्रतियोगिता आयोजना सम्पन्न गरिएको छ ।

तीनधारेको गोर्खा सांस्कृतिक संस्थानद्वारा आयोजना गरिएको कार्यक्रममा पत्रकार एवं लेखक युवराज सुन्दास, युवा कवि नवराज राई, संस्थानका सामाजिक अभियन्ता विजय मगर लगाएत उपस्थित कार्यक्रममा सोही क्षेत्रका १०० वर्ष पुगेका जेष्ठ नागरिक चन्द्रवीर लामा (स्याङदेन म्हेम्हे) को प्रमुख आतिथ्यता रहेको थियो ।

दार्जीलिङको पहाडको जीवन रेखा मानिने डेढ सय वर्षको इतिहास बोकेको ५५ राष्ट्रिय राजमार्गमा निकालिएको सांस्कृतिक झाँकीले नेपाली जनजीवनसँग जोडिएका झाँकीहरु प्रस्तुत गरिएको थियो । नेपाली समुदायको ग्रामीण क्षेत्रका पारम्परिक घरको प्रस्तुति सँगै तिहारको झलक झाँकीमा प्रस्तुत गरिएको थियो । यसबाहेक आधुनिक विकासक्रमको चपेटमा विलुप्त बन्दै गएको नेपाली जातिको हातहतियार निर्माण गर्ने आरणलाई झाँकीमा प्रस्तुत गरेर जीवन्त तुल्याएको थियो ।

सांस्कृतिक झाँकी प्रतियोगितामा प्रथम स्थान जनसेवा संघ राजबारी, दोस्रो स्थान नवज्योति संघ चुनभट्टी र तेस्रो स्थानमा प्रगति संघ मिठाई डाँड़ा बन्न सफल भएको थियो । स्मृति वनमा सम्पन्न भएको लोक नृत्य प्रतियोगितामा कौडा, पूर्वेली मारुनी, साकेवा सिरी, झ्याउरे, नेवारी नाचमा धिन्तामै, देवी नाच, लाखे नृत्य, तामाङ सेलोको प्रस्तुति उत्कृष्ट रहेको थियो । यस लोक नृत्य प्रतियोगितामा ग्राम कल्याण समिति नयाँ कमानले प्रथम, फ्रेण्डस् क्लब सिपाहीधुराले दोस्रो स्थान, प्रगति संघ मिठाई डाँड़ाले तेस्रो स्थान हासिँल गरेको थियो । सांस्कृतिक झाँकी र लोक नृत्य प्रतियोगिताका लागि निर्णायकमा अनिता रसाइली, जमुना शर्मा थापा र सञ्जय प्रधान रहेका थिए ।

कार्यक्रममा गत गोर्खाल्यान्ड टेरिटोरियल एड्मिनिस्ट्रेसन (जीटीए) निर्वाचित भएका तीनधारे-महानदी समष्टिका नवनिर्वाचित सांसद नवराज छेत्री, मुम्बई र कोलकातामा भएको म्याराथनमा राम्रो प्रदर्शन गरेका अनिश माझी र मनिष माझीलाई सम्बर्द्धना जनाइएको थियो ।
दार्जीलिङ पहाडका विभिन्न ठाउँमा सार्वजनिक दुर्गा पूजाहरु पनि आयोजना गरिएको छ । नवरात्रको घटस्थापनाको पहिलो दिनदेखि नै पूजा स्थलमा राग मालश्री निरन्तर गाउने कार्य भइरहेको छ ।