प्युठान, १५ असोज । गृहजिल्ला प्युठानमा टिकट दाबी गरेका नेपाली कांग्रेसका केन्द्रीय सदस्य एवम् पूर्व राष्ट्रिय योजना आयोगका उपाध्यक्ष प्राडा गोविन्दराज पोखरेल यसपाली प्रतिनिधि सभाको दौडबाट बाहिरिएका छन् ।
पार्टी सभापति शेरबहादुर देउबालाई मनाएर आफू गठबन्धनको साझा उम्मेद्वार बन्ने नेता पोखरेलको धोको थियो । तर, लामो समयको प्रयासमा पनि उनी सफल हुन सकेनन् ।
प्युठानबाट राष्ट्रिय जनमोर्चाकी उपाध्यक्ष दुर्गा पौडेललाई उम्मेदवार बनाउनेगरी गठबन्धनमा सहमति भइसकेकाले उम्मेदवार वनेर चुनाब लड्ने पोखरेलको सपना चकनाचुर भएको हो ।
पोखरेललाई कांग्रेसभित्र पनि टिकट पाउनुपर्ने चर्को दबाब छ । डा. शेखर कोइराला पक्षका पोखरेललाई प्यूठानमा देउवा पक्षको समेत साथ छैन ।
सामाजिक सञ्जालमार्फत पोखरेलले आफू रुख चिह्न लिएर उम्मेदवार भई प्यूठान आउने सम्भावनामाथि प्रश्न चिह्न लागेको उल्लेख गरेका छन् । तर, औपचारिक समाचार नआउँदासम्म सम्भावना कायमै रहेको समेत उनले प्रतिक्रिया दिए ।
पोखरेलले गठवन्धनबाट राष्ट्रिय जनमोर्चाले टिकट पाए आफूले रुख चिह्नमा मात्र मत माग्ने बताएका छन् ।
सामाजिक सञ्जालमार्फत बाहिर आएका गठवन्धनका समाचार सहि भएमा प्यूठानी जनताका बीच रुख चिह्नमा पार्टी र पार्टीको उम्मेदवारलाई मात्र मत माग्न आउने उनले लेखेका छन् । उनले राजमो र त्यसको चुनाव चिह्न गिलासमा भोट नमाग्ने बताएका हुन् ।
‘मलाई प्यूठानमा संघीय उम्मेदवार हुनुहोस् भन्ने धेरै शुभेच्छुक र साथीहरुको प्रस्तावमा म पार्टीको केन्द्रीय सदस्य भएकाले गम्भीर छु,’ उनले लेखेका छन्, ‘तर प्रस्तावलाई सकारात्मक रुपले लिएर उपायहरु खोज्दै छु । यस बीचमा केही नयाँ परिदृष्यको विकास भएमा अवश्य जानकारी गराउने छु ।’
पोखरेल ०७४ सालको निर्वाचनमा राजमोकी दुर्गा पौडेलसँग नै पराजय भएका थिए । पोखरेलले ०७४ मा ३१ हजार २८६ र तत्कालीन बामगठबन्धनबाट पौडेलले ४७ हजार ५१४ मत पाएकी थिइन् ।
यसअघि जिल्लाका काँग्रेस नेताहरूले जिल्लामा राजमो चौथो दल भएकाले नेतृत्व आफैले पाउनुपर्ने निर्णय केन्द्रीय समितिलाई पठाइसकेका छन् ।
यस्तो छ उनको घोषणा
म २०७४ सालमा नेपाली काग्रेसको तर्फवाट उम्मेदवार हुदा करिव ३१२८६ भन्दा वढी प्युठानी दाजुभाई दिदीवहिनिहरुले मलाई माया गरि मत दिनु भएको थियो। पराजीत भए पछि ५ वर्षमा म प्युठानका ६४ मध्ये ६३ वार्डमा पटक पटक दाजुभाई दिदीवहिनिहरुको घरआगनमा पुग्ने मौका पाए। मेरो उम्मेदवारीका लागि सिफारिस पनि भएको र जनताको सुखदुखमा आफुले सकेसम्म सहभागि भएकोले धेरैले फेरि पनि म नेपाली काग्रेसवाट उम्मेदवार भई आओस भन्ने ईच्छा गरेको पाएको छु। तर अनौपचारिकरुपमा बाहिर आएका समाचारका आधारमा म फेरि रुख चिन्ह लिएर उम्मेदवार भई आउने सम्भावना माथि प्रश्न चिन्ह लागेको छ। तर औपचारिक समाचार नआउदा सम्म सम्भावना छदैछ।
जय प्युठान!!! जय नेपाल !!!
प्रतिक्रिया