काठमाडौं, ३१ साउन । कमल थापा नेतृत्वको राप्रपा नेपालले प्रतिनिधिसभा र प्रदेशसभाका अधिकांश क्षेत्रमा एकल उम्मेदवार खडा गरेर आगामी निर्वाचनमा प्रतिस्पर्धा गर्ने निर्णय गरेको छ ।
सोमबार र मंगलबार बसेको केन्द्रीय कार्यसमितिको बैठकले देशको वर्तमान अवस्थाको समीक्षा, पार्टीको भावी कार्यदिशा र कार्यक्रमको निर्धारण तथा आगामी निर्वाचनको तयारीका सम्बन्धमा गम्भीर छलफल गरी उक्त निर्णय गरेको हो ।
नर्णय अनुसार आगामी निर्वाचनमा प्रदेशसभा र प्रतिनिधिसभाका केही सीमित क्षेत्रहरूमा अन्य राजनीतिक दलसँग चुनावी तालमेल गर्ने तर तालमेल नभएको सबै क्षेत्रमा पार्टीले आफ्नै उम्मेदवार खडा गर्ने भएको छ ।
‘तालमेल नभएका बाँकी सबै प्रदेशसभा र प्रतिनिधिसभाका क्षेत्रमा राप्रपा नेपालले उमेदवार खडा गर्नेछ,’ बैठकपछि मंगलबार जारी विज्ञप्तिमा उल्लेख गरिएको छ । त्यसका लागि प्रदेशसभा र प्रतिनिधिसभाका प्रत्यक्ष र समानुपातिक दुवै तर्फका उमेदवारहरुको नाम जिल्ला कार्यसमितिले भदौ २१ गतेभित्र प्रदेश कार्यसमितिमा पठाउने र जिल्ला कार्यसमितिको सिफारिशसहित प्रदेश कार्यसमितिले भदौ २५ गतेसम्ममा केन्द्रमा पठाईसक्नु पर्ने छ ।
त्यस्तै केन्द्रीय कार्यसम्पादन समितिले संसदीय बोर्डको सिफारिशमा भदौ मसान्त भित्रै सम्पूर्ण उमेदवारहरुको नामावली टुङ्गो लगाउने निर्णय पनि बैठकले गरेको छ ।
बैठकले आगामी २०७९ असोजको पहिलो हप्ता वीरगञ्जमा ‘बृहद राष्ट्रिय भेला’ आयोजना गर्ने निर्णय पनि गरेको छ ।