काठमाडौँ, २७ वैशाख । वैशाख ३० गते हुने स्थानीय तहको निर्वाचनको मंगलबार मध्यरातिदेखि मौन अवधि सुरु हुँदैछ ।
निर्वाचन आयोगका अनुसार शुक्रबार हुने मतदानको पूर्वसन्ध्यामा मंगलबार राति १२ बजेबाट मौन अवधि सुरु हुँदैछ ।
त्यसअिघ नै आयोगले मतदानस्थलको ३०० मिटर वरपरका निर्वाचन प्रचार सामग्री हटाउन निर्देशन दिइसकेको छ ।
त्यस्तै, आयोगले मौन अवधि अगाडी नै उम्मेदवार र उनीहरूका प्रशंसकका फेसबुक, ट्वीटर, टिकटकलगायत पेजका स्पोन्सर सामग्री हटाउन समेत आग्रह गरेको छ ।
सामाजिक सञ्जालमा रहेका आचारसंहिताविपरीतका चित्र, पोष्ट हटाउन आयोगले भनेको छ ।
त्यस्तै, आयोगले नयाँ प्रचारप्रसार सामग्री पोस्ट नगर्न दुरसञ्चार कम्नीलाई निर्देशन दिइसकेको छ ।
यसअघि नै आयोगले मतदानको दिन वैशाख ३० गते सार्वजनिक सवारीका साधनहरु चल्न नदिने निर्णय गरिसकेको छ ।
एम्बुलेन्स, खानेपानीको ट्यांकर, दूध बोक्ने सवारी साधन, दमकल, दूरसञ्चार तथा केबल सेवा, शववाहन, अस्पतालका स्वास्थ्यकर्मीको आवागमनका लागि प्रयोग हुने साधन भने सञ्चालनमा रहनेछन् ।
मौन अवधिमा के के गर्न पाइन्नँ ?
–मौन अवधिभर निर्वाचन प्रचारप्रसारलगायत कुनै पनि प्रकारका छलफल, अन्तरक्रिया, सभा–सम्मेलन, कार्यशाला, गोष्ठी गर्न नहुने
– निर्वाचन प्रचारप्रसार गर्न र मत माग्न नहुने
– मौन अवधि सुरू हुनुभन्दा अगाडि मतदान केन्द्रको ३०० मिटर वरिपरी राखिएका आआफ्ना निर्वाचन चिह्न तथा प्रचार र प्रसारका सामग्री हटाएको हुनुपर्ने
– एसएमएस, फेसबुक, भाइबर जस्ता सामाजिक सञ्जालमार्फत मत माग्न र निर्वाचन प्रचारप्रसार गर्न नहुने
–मौन अवधिमा उम्मेदवार वा राजनीतिक दलको प्रचारप्रसार हुने गरी कुनै समाचार वा सूचना प्रकाशन वा प्रसारण गर्न नहुने
प्रतिक्रिया