एकीकृत समाजवादीका नेताको प्रश्नः आफैँले राष्ट्रघाती भनेको एमसीसी रातारात राष्ट्रहितमा कसरी भयो ?

काठमाडौँ, १६ फागुन । नेकपा एकीकृत समाजवादी प्युठानका जिल्ला उपाध्यक्ष मोहम्मद हलिम हलुवाईले एमसीसी कसरी राष्ट्रहितमा भयो भनि प्रश्न गरेका छन् ।

उनले एकीकृत समाजवादीले आफ्नो पूर्वनिर्धारित धारणा विपरीत संसदबाट अमेरिकी सहयोग परियोजना एमसीसी पारित गर्न भूमिका खेलेकामा आफू स्तब्ध भएको उल्लेख गरेका छन् ।

हलुवाईले सोमबार एक विज्ञप्ति जारी गर्दै आफैँ राष्ट्रघाती भनिएको सम्झौता रातारात कसरी राष्ट्र हितमा भयो भनि प्रश्न गरेका हुन् ।

‘आफैँ राष्ट्रघाती भनेको सम्झौता रातारात राष्ट्रहितमा कसरी भयो ?’ भनी विज्ञप्तिमा उनले प्रश्न गरेका छन् ।

‘सत्ता स्वार्थका लागि गरेको यस खालको भूमिकाले जनतासामु यस पार्टीका तर्फबाट मुख देखाउन लायक नरहेको अनुभूति हामी देशभरिका कार्यकर्ताहरुले गरिरहेका छौँ,’ विज्ञप्तिमा उल्लेख छ ।

उनले गठबन्धन, सत्ता, सभामुख र १४ जना सांसदहरु टिकाउन एमसीसी अनुमोदन गरिनु खेदजनक रहेको उल्लेख गरेका छन् ।