काठमाडौँ, २९ माघ । सहिद स्मारक ए डिभिजन लिग अन्तर्गत शनिबारको खेलमा मछिन्द्र क्लबले च्यासल युथ क्लबमाथि २–० को सहज जित हात पारेको छ ।
त्रिपुरेश्वरस्थित दशरथ रंगशालामा मछिन्द्रलाई जित दिलाउन विमल घर्तीमगर र सुनिल बलले १–१ गोल गरेका थियो ।
१७ औं मिनेटमा विमलले गोल गर्दै मछिन्द्रलाई १–० को अग्रता दिलाएका थिए भने रेजिन धिमालको कर्नरमा विमलको हेड पोलमा लाग्दै गोलमा परिणत भएको थियो ।
यस्तै, ३५ औं मिनेटमा सुनिलले मछिन्द्रको अग्रता दोब्बर पारेका थिए । दोस्रो हाफमा थप गोल निस्कन नसक्दा मछिन्द्रले २–० को सहज जित हात पारेको हो ।
त्यस्तै, सातदोबाटोस्थित एन्फा कम्प्लेक्समा भएको खेलमा सातदोबाटो युथ क्लबले नेपाल पुलिस क्लबमाथि १–० को जित हात पारेको छ ।
प्रतिक्रिया