काठमाडौं, २९ साउन । नेपाली कांग्रेसका २२ जना आमन्त्रित केन्द्रीय सदस्यहरुले सामुहिक राजीनामाको घोषणा गरेका छन् ।
उनीहरूले सभापति शेरबहादुर देउवालाई आफ्नो राजीनामापत्र बुझाइसकेका छन् । सामुहिक राजीनामा घोषणा गर्नेहरूमा नन्दनकुमार दत्त, कुमार खड्का, बालकृष्ण पाण्डेय, गोरख (आनन्द) विष्ट, नरेन्द्रकुमार चौधरी, हसन अन्सारी, किरणराज शर्मा पौडेल र रमा कोइराला पौडेल छन् ।
त्यसैगरी कृष्णकिशोर घिमिरे, गोपालकुमार बस्नेत, सुधीरकुमार शिवाकोटी, मनोहरनारायण श्रेष्ठ, ध्रुव वाग्ले, मोहनसिंह राठौर, शम्भुलाल श्रेष्ठ, अभिषेख प्रताप शाह, दयाराम पाण्डे, जनकराज कलौनी, भूमिबहादुर (विश्व) गुरुङ, आशाराम चौधरी, दिलीप राई र राजेश बहादुर सिंहले पनि राजीनामा दिएका छन् ।
कांग्रेसको विधानमा आमन्त्रित केन्द्रीय सदस्यलाई क्षेत्रीय प्रतिनिधि सरह अधिकार नदिएकोमा असन्तुष्टि जनाउँदै उनीहरुले राजीनामा घोषणा गरेका हुन् । जारी केन्द्रीय समिति बैठकमा उनीहरूले राजीनामा दिएका हुन् ।
कांग्रेस विधानमा केन्द्रीय पदाधिकारी र सदस्य स्वतः महाधिवेशन प्रतिनिधि हुने व्यवस्था छ । आमन्त्रित केन्द्रीय सदस्य भने तलबाटै निर्वाचित हुनुपर्ने व्यवस्था छ । उक्त व्यवस्था हटाउनपर्ने उनीहरुको माग छ ।
प्रतिक्रिया