शुक्रबार, १६ चैत २०८०
DainikNepal.com
शुक्रबार, १६ चैत २०८०

२०७८ सालको पात्रो स्वीकृत, एकै वर्ष कसरी पर्यो तीन वटा दशैं ?

दैनिक नेपाल २०७७ फागुन १७ गते १३:१६

काठमाडौं, १७ फागुन । नेपाल पञ्चाङ्ग निर्णायक समितिले वि.सं. २०७८ सालको पात्रो स्वीकृत गरेको छ ।

स्वीकृत पात्रोका अनुसार आगामी वर्ष २०७८ मा एकै वर्ष तीन वटा दशैं परेको छ । आगामी वैशाख ७ गते मंगलबार चैत्र शुक्ल अष्टमी अर्थात् चैते दशैँ परेको छ । यसैगरी २०७८ सालको चैत २६ गते शनिबार पनि अर्को चैत्र शुक्ल अष्टमी अर्थात् चैते दशैं परेको छ ।

त्यसैगरी आश्विन शुक्ल पक्षको दशैं (वडादशैं) आगामी वर्ष असोज २१ गते बिहीबार घटस्थापना गरेर शुरु हुने भएको छ । असोज २७ गते बुधबार महाअष्टमी, असोज २८ गते बिहीबार महानवमी र असोज २९ गते शुक्रबार विजयादशमी पर्व परेको छ ।

त्यस्तै कार्तिककृष्ण पक्षमा शुरु भएर शुक्ल पक्षमा सकिने तिहार कात्तिक १६ गते मंगलबारदेखि शुरु हुने छ । लक्ष्मीपूजा कात्तिक १८ गते बिहीबार र भाइटीका कात्तिक २० गते शनिबार परेको छ ।

यो वर्ष (२०७७) को असोजमा मलमास (अधिकमास) परेकाले २०७८ मा तीन वटा दशैं परेको नेपाल पञ्चाङ्ग निर्णायक समितिले बताएको छ ।

समितिले यस वर्षका लागि १३ वटा पञ्चाङ्ग (पात्रो) लाई यसअघि नै स्वीकृति दिइसकेको छ ।

समितिले पञ्चाङ्गकार सूर्यनाथ पन्तको ‘तोयनाथ’, विश्वराम (शर्मा) सापकोटाको ‘बाबुराम’, मुरारीराज पाण्डेको ‘नरनाथ’, पद्मनाभ त्रिपाठीको ‘हिमाल’, डिल्लीराज जोशीको ‘अठोला’, दिव्यपुरुष ढकालको ‘तारकेश्वर’, सूर्यप्रसाद ढङ्गेलको ‘सूर्य’, लोकराज पौडेलको ‘आकाश–दर्शन’, शशीधर जोशीको ‘बगलामुखी’, दामोदर जोशीको ‘शुभ’, श्रीकेश कौशिकको ‘बाबा गोरखनाथ’, सिद्धिलक्ष्मी व्यञ्जनकारको ‘सिद्धि’ र चेतराज उपाध्यायको ‘खप्तड तारानाथ’ पञ्चाङ्ग गरी १३ वटा पात्रोलाई स्वीकृति दिएको छ ।

प्रतिक्रिया
सम्बन्धित